Nga Blendi Gashi
Saktësisht 50 minuta ka zgjatur protesta e partive opozitare e organizuar në kundërshtim të marrëveshjeve për ‘Zajednicën’ dhe Demarkacionit me Malin e Zi.
Në fillim të manifestimit është intonuar himni kombëtar, derisa protestuesit brohoritnin “Poshtë Zajednica”, “UÇK, UÇK”, dhe parulla tjera.
Opozita sërish ka paralajmëruar pushtetin se nuk do të ndalen deri në tërheqjen e marrëveshjeve.
Qytetarët gjatë gjithë kohës thirrnin emrat e liderëve opozitarë, derisa masa është ndezur kur në skenëështë paraqitur ish lideri i VV-së Albin Kurti, ndaj të cilit ka fletarrest.
Kurti, elektrizoi masën
Pikërisht, Kurti ka folur mëgjatë se tre liderët opozitës së bashkuar.
Ai ka thënë se festat e nëntorin janë lënë në Kosovë si dytësore, duke shtuar se bashkimi i Kosovës me Shqipërinë është edhe në të mirë të Evropës. Ai poashtu ka kërkuar lirim e deputetë së AAK-së Donika Kadaj-Bujupi dhe aktivistëve të VV-së.
Ai ka deklaruar se bashkimi kombëtar i shqiptarëve nuk e cenon Bashkimin Evropian, por e forcon.
“28 Nëntori sivjet në Prishtinë mund ta festojmë vetëm duke protestuar sepse në vend se Qeveria ta bashkojë Mitrovicën apo po e ndan dhe po e na e fal tokën, përmes demarkacionit.Në vend se pas shpalljes së pavarësisë të kemi bashkim me Shqipërinë, kemi bashkim komunash serbe brenda Kosovës. Opozita e bashkuar është garanci se kurrë nuk do ta lejojë zajednicën brenda Kosovës.Me 28 Nëntor protestojmë duke festuar sepse shteti i kapur i Kosovës i ka bërë 28 Nëntor ditë memorialë si festë të rangut të dytë”, ka deklaruar Kurti.
Flamur i Kosovës përveç që nuk është parë në këtë tubim, ai nga Albin Kurti u cilësuar si flamur lara-lara.
Limaj: Referendum ose zgjedhje
Kreu i Nismës për Kosovën, Fatmir Limaj, i pari e ka marrë fjalën në manifestimin e opozitës.Ai ka thënë se 28 Nëntorin e bëjnë të rëndësishëm Ismail Qemali dhe ditëlindja e Adem Jasharit.
“Sot jemi bashkuar qytetarë nga e gjithë vendi pa dallime politike. Dëshirojmë të dërgojmë mesazh me pjesëmarrje fizike kundër marrëveshjeve që cenojnë dhe zvogëlojne territorin e Kosovës. Jemi mbledhur për ta mbrojtur shtetin”, ka thënë Limaj.
Ai ka ftuar Isa Mustafën e Hashim Thaçin që të dëgjojnë zërin e popullit dhe t’i anulojnë marrëveshjet.
“Nëse jo, atëherëë ne kemi kërkesë që të dërgohen në referendum dy marrëveshjet dhe të shkojmë në zgjedhje. Qytetarë, nuk ka asnjë masë represive dhe dhunë që ndal opozitën t’i rrëzojë marrëveshjet”, ka thënë Limaj.
Haradinaj: S’kemi as tokë me falë e as nuk e kemi n’mend me e lanë Serbinë me u kthy
Lideri i AAK-së, Ramush Haradinaj, fjalimin e tij para qytetarëve, e ka filluar me një varg të poezisë së autorit Ali Podrimaj duke thënë se ‘Kosova është gjaku im që nuk falet’.
“Shqiptarë kudo ku jemi, urime Dita e Flamurit. Dita e Pavarësisë dhe e Lirisë. Shqiptar e krenar, trim e bujar, i dijshëm e i vyeshëm. Mik, liridashës dhe i respektuar.Me 28 Nëntor, nëpër shekuj i kemi thirrë vetëdijes sonë për fatin tonë si komb. Përjetësisht mirënjohje sakrificës së bashkëkombasve tanë për liri.“Kosova është gjaku im që nuk falet” – ka thënë Ali Podrimja.Ne jemi evropianë dhe e nderojmë mikun e përjetshëm- Amerikën.Pse Kosova sot është “e përulur dhe e turpnume”, “e lodhur dhe ekonomikisht e dërmuar”. Një Kosovë me kaq shumë potenicale.Pushteti na ka nxjerr në rrugë, se po don me e ba Serbinë zot’ Shpije n’Kosovë. Na ka detyru me përdor gaz, se po don me i falë tokë Malit t’ Zi. Ne i themi Jo, se Kosova asht’ Njo e s’bahet dy.Pushteti po na burgosë e po na i thyen dyert veç me u pajtu me marrëveshjet e tij. Ne i themi Jo. S’kemi as tokë me falë e as nuk e kemi n’mend me e lanë Serbinë me u kthy.Kosovën e kemi çliru bashk me ju e me aleatët. Bashk do ta mbrojmë.Kosova është e qytetarëve të saj, e të gjithëve, edhe e serbëve të Kosovës, por jo e Serbisë. Ju kemi thirrë sot, për një shtet unitar e jo për një Kosovë copa-copa. Jemi bashku sot kundër t’ligut e t’keqit. Ju themi atyre mos e rrezikoni shtetin me këto marrëveshje”, ka deklaruar Haradinaj.
Ymeri nuk e duam Serbinë në Prishtinë e Malin e Zi në Pejë
Kryetari i VV-së, Visar Ymeri, ka thënë se ata nuk t’i pranojmë marrëveshjet të cilat cenojnë Republikën.Ai ka thënë Isa Mustafa e Hashim Thaçi po përdorin pushtetin për të shtypur opozitën.Ymeri ka thënë se ata nuk do të ndalen se protestuar për të larguar Serbinë nga Prishtina e Malin e Zi nga Peja.
“Ne nuk do ta pranojmë Zajednicen dhe nuk do të ndalemi. Nuk mund ta pranojmë as Malin e Zi në Pejë.Republika është e jona dhe e qytetarëve, nuk ka shumicë parlamentare që mund të ketë mandatin që të bëjë çfarë të dojë për fatin e vendit, dhe ne do ta parandalojmë këtë sa herë që është e nevojshme”, ka thënë Ymeri.
VV: Mbi 35 mijë njerëz morën pjesë në manifestim
Lëvizja Vetëvendosje ka publikuar një fotografi të tubimit të organizuar nga partitë opozitare, ku shkruan se në këtë manifestim morën pjesë mbi 35 mijë qytetarë.
Ndërkohë, institucionet e Kosovës, saktësisht Policia e Kosovës, ende nuk ka dal me ndonjë informatë lidhur me numrin e pjesëmarrësve në këtë tubim.
/tesheshi.com/
