Partia Demokratike është pozicionuar në mbështetje të banorëve të Shkozës, ku rreth 150 ndërtime do të prishen, për shkak të zgjerimit të rrugës. Nënkryetari demokrat i Kuvendit, Edi Paloka, i drejtoi një apel kryeministrit Edi Rama, që të mbajë premtimet që i janë bërë këtyre banorëve në fushatë, për legalizimin e banesave dhe kompensimin e tyre me vlerën e tregut
Paloka tha se kryeministri duhet të bëhet njerëzor dhe të ndihmojë qytetarët dhe jo ti shkaktojë më shumë halle dhe problem.
“Banorët janë aty sepse iu premtua gjatë fushatës elektorale nga deputetja, njerëz të qeverisë, se shtëpitë e tyre do të legalizohen e do të kompensohen, por sapo erdhën në pushtet, kjo është përgjigjja e Edi Ramës dhe qeverisë së tij.
Shteti nuk është për ti marrë shpirtin të pamundurve. Shteti ngrihet për t’i ndihmuar të pamundurit e të dobtit.
Jemi këtu për të sensibilizuar këdo që do të jetë në krah të banorëve. Zgjidhja është ajo që u është premtuar. Shtëpitë që janë të palegalizuara të legalizohen dhe të kompensohen me vlerën e tregut, ndërsa banorëve tu jepet kohë dhe mundësi për tu strehuar si njerëz dhe jo të nxirren si kafshë nga banesat e tyre”, tha Paloka. /tesheshi.com/
