Presidenti ukrainas: Gati për jo luftë!

Ukraina është e gatshme të marrë vendimet e nevojshme për të ndaluar luftën në Donbas, në rajonin e saj lindor, në një samit të ri të liderëve të Ukrainës, Rusisë, Francës dhe Gjermanisë, tha të martën presidenti ukrainas Volodymyr Zelensky.

“Është koha për të rënë dakord për përfundimin e konfliktit dhe ne jemi të gatshëm të marrim vendimet e nevojshme gjatë samitit të ri të liderëve të katër vendeve”, citohet të ketë thënë Zelenski nga Reuters.

Në të njëjtën deklaratë, kreu i zyrës së presidentit, Andrei Jermak, tha se Kievi dëshironte të binte dakord për masa të tilla si një armëpushim dhe më shumë shkëmbime të burgosurish.

Negociatat në formatin e Normandisë duhet të ndihmojnë në përfundimin e konfliktit në Ukrainën lindore midis forcave të qeverisë ukrainase dhe separatistëve pro-rusë, por ngecën në nëntor për shkak të pikëpamjeve të ndryshme se si të vazhdohet.

Që atëherë, Rusia ka vendosur rreth 100,000 trupa përgjatë kufirit të saj me Ukrainën. Ajo pretendon se nuk po përgatitet për pushtim, por dëshiron që Perëndimi të ndalojë mbështetjen e tij për qeverinë ukrainase dhe kërkon garanci që NATO nuk do të zgjerohet më tej në lindje.

Diplomatët e lartë francezë dhe gjermanë ishin në Moskë javën e kaluar për të parë se si të ringjallet formati i Normandisë.

Një zyrtar presidencial francez u tha gazetarëve të martën se ai shpresonte se këshilltarët e lartë do të mbanin një takim këtë muaj, pasi Kievi tregoi se ishte gati për gjeste të caktuara politike për të nisur negociatat.

Zyrtari tha se negociatori kryesor rus, Dmitry Kozak, dha dritën jeshile për vazhdimin e negociatave dhe se Zelensky dhe Jermak bënë të njëjtën gjë.

 “Vështirësitë mbeten. Nuk kemi iluzione, por mendojmë se mund të mbajmë takimin e parë të këshilltarëve në formatin e Normandisë deri në fund të janarit”, tha zyrtari, i cili dëshiroi të mbetet anonim. /tesheshi.com/