Andrzej Duda, presidenti i Polonisë, ka dhënë një intervistë për agjencinë e lajmeve Reuters, ku nuk ka ngurruar të deklarojë se Rusia po nxit një Luftë të Ftohtë të re përmes veprimeve të veta në Ukrainë dhe në Siri.
Duke iu përgjigjur komenteve të kryeministrit rus, Medvedev-it, Duda ka folur qartë në intervistë, “Nëse z. Medvedev flet për Luftë të Ftohtë, atëherë shihni veprimet ruse: është e qartë se kush po kërkon një Luftë të Ftohtë të re”.
“Nëse dikush ndërmerr aktivitete agresive ushtarake në Ukrainë dhe në Siri, nëse dikush përforcon praninë ushtarake pranë fqinjëve të tij, atëherë ne kemi një përgjigje të qartë në lidhje me atë se kush kërkon të nisë një Luftë të Ftohtë të re. Sigurisht, nuk është Polonia apo aleanca e NATO-s!”
Polonia është prej kohësh një kritike e ashpër e veprimeve ruse, dhe presidenti Duda, sipas Reuters-it, ka përsëritur ambiciet e vendit të tij për një prani “intensive” të NATO-s në territorin polak.
Presidenti i Polonisë ka thënë se vendi i tij është gati të marrë pjesë në çdo përpjekje të NATO-s në Siri, por pa dërguar trupa, duke pritur në shkëmbim shtim të pranisë së aleancës ushtarake në Europën Lindore. /tesheshi.com/
