Këshilli Kombëtar Shqiptar i Luginës së Preshevës, përmes një komunikate për medie ka shprehur brengosjen për mënyrën se si autoritetet e Serbisë po bëjnë pastrimin etnik të vendbanimeve shqiptare në Luginë të Preshevës.
Në këtë komunikatë thuhet se Këshilli Kombëtar Shqiptar, duke u thirrur në Ligjin për qasje në informacionin të rëndësisë publike ka kërkuar nga Ministria e Punëve të Brendshme të Serbisë, përkatësisht stacionet policore në Preshevë, Bujanoc dhe Medvegjë sikur edhe Administrata Policore në Vranjë dhe Leskoc informacion rreth pasivizimit të vendbanimeve të qytetarëve shqiptarë të Luginës së Preshevës.
“Kësisoj nga përgjigjet e dhëna nga MUP-i shihet qartë që vetëm në Komunën e Preshevës dhe Bujanocit për vitin 2014 i është pasivizuar 132 qytetarëve e drejta vendbanimit, duke u thirrur në Ligjin mbi vendbanimet dhe vendqëndrimet, si dhe 124 pasivizime gjatë vitit 2013. Ndërkaq, veprimet nuk po ndalen. Ministria e Punëve të Brendshme e Republikës së Serbisë në këtë drejtim duke vepruar në heshtje nëpërmjet Ligjit mbi vendbanimin dhe vendqëndrimin, në mënyrë arbitrare qytetarëve shqiptar nga Presheva, Bujanoci dhe Medvegja po ua mohon të drejtën ekzistuese të vendbanimit”, thuhet në komunikatë.
Këshilli Kombëtar Shqiptar konsideron se veprimet e këtilla të Ministrisë së Punëve të Brendshme janë të papranueshme, sepse të njëjtat janë në kundërshtim me të drejtat dhe liritë e njeriut. Sipas këtij këshilli, zbatimin selektiv të ligjeve ndaj qytetarëve shqiptarë, andaj në anën tjetër fton të gjithë përfaqësuesit politikë të mobilizohen për të shqyrtuar këtë çështje shqetësuese për shqiptarët e Luginës së Preshevës, sepse me pasivizimin e vendbanimit të qytetarëve të këtij rajoni i mohohen edhe të drejtat e tjera elementare, siç është edhe e drejta për të votuar.
“Gjithashtu, KKSH bën me dije se ndërrimi artificial i strukturës së popullsisë në Luginën e Preshevës është antikushtetues dhe bie ndesh me konventat ndërkombëtare. Me qëllim të parandalimit të këtij problemi, KKSH do të shfrytëzojë të gjitha mundësitë e veta që shkeljet e këtilla t’i parandalojë dhe denoncojë në të gjitha institucionet më të larta të vendit”, thuhet në komunikatën e KKSH-së, e nënshkruar nga kryetari Jonuz Musliu.
