Prokurorët e çështjes “Doshi” tashmë kanë regjistruar dëshmitë e kreut të Kuvendit Ilir Meta dhe ministrit të Brendshëm, Sajmir Tahiri dhe në mesditë do të regjistrojnë edhe atë të Kryeministrit Edi Rama.
Siç mësohet, kreu i Kuvendit, Ilir Meta ka zbardhur të gjitha bisedat me deputetin Tom Doshi, në lidhje me akuzën për atentat, duke i ofruar edhe një material filmik, i cili u fol që do të paraqitej në Kuvend, pro që në momentin e fundit u la për arsye se duhej të përbënte provë në Prokurori. Ndërkohë, ministri i Brendshëm ka dorëzuar të gjithë materialin e regjistruar nga bisedat me Doshin dhe mësohet gjithashtu se është dorëzuar edhe një material të regjistruar vokalisht të këtyre bisedave.
Dëshmia e Ilir Metës përpara prokurorëve të Krimeve të Rënda ka zgjatur rreth 90 minuta, ku kreu i Kuvendit u është përgjigjur pyetjeve në lidhje me akuzat e ngritura kundër tij për tentativë vrasjeje nga deputeti Tom Doshi. Pas daljes, Kryetari i Kuvendit tha se është i hapur për një hetim të plotë të të gjithë çështjes dhe ripërsëriti qëndrimin se videoja është një sajesë, duke e cilësuar atë “video të Tomës për Tomën”.Meta tha se ishte i gatshëm që, nëse prokurorët e shohin të arsyeshme, të ballafaqohet me dy akuzuesit e tij, deputetin Doshi dhe ish-kryeministrin Sali Berisha.
“Jam këtu që të bashkëpunoj me prokurorinë për hetimin e plotë të kësaj çështjeje, duke iu nënshtruar ligjit dhe vetëm në respekt të tij. Kam shprehur gatishmërinë nëse prokuroria do ta shohë të arsyeshme të bëjë ballafaqim me dy akuzuaesit e mi, Doshin dhe Berishën dhe me cilindo që pretendon se ka prova që përfshijnë Metën me këtë çështje. Videon e Tomës me Tomën për provë vetëm Doktori mund ta marrë, ndërsa Toma si person përbën më shumë antiprovë se sa provë juridike. Video e Tomës me Tomën nuk mund të përbëjë provë. Edhe vetë Toma si person është një antiprovë”, tha ai.
Kryeparlamentari u pyet edhe për kërkesën e opozitës për dorëheqje, kërkesë kjo e artikuluar disa herë edhe nga kryetari i Partisë Demokratike, Lulzim Basha. “Kur kërkesa vjen nga Basha, i akuzuar për aferën e korrupsionit për 230 milionë euro në rrugën Durrës-Kukës, e që dha shembullin që nuk u largua nga qeveria, por bëri çdo gjë për ta mbyllur çështjen sipas procedurave, jo për t’i shkuar çështjes deri në fund… ai është një model i shkëlqyer për t’u marrë shembull se si i hapet rruga hetimit”, tha Meta. Kryetari i LSI-së tha se, qoftë si kryetar i Parlamentit, qoftë si deputet, nuk ka asnjë ndikim në procesin e hetimit, ndërsa shtoi se tashmë akuzat vijnë nga opozita, pas deklaratave të Tom Doshit, shantazhin e të cilit për doganat dhe tatimet, sipas Metës, grupi parlamentar socialist nuk e pranoi. Meta iu përgjigj pozitivisht ftesës së prokurorisë ditën e enjte, e cila e ftoi për të dhënë dëshmi, së bashku me Kryeministrin Edi Rama, Ministrin e Brendshëm Saimir Tahiri, deputetët Sali Berisha, Mhill Fufi dhe Mark Frroku.
