Përse Ilir Meta ka thirrur Parlamentin të martën kur nuk i i ngre dot komisionet e Vettingut pa opozitën?
Ka bërë çudi vendimi i kreut të Kuvendit, i materializuar me një letër drejtuar grupeve parlamentare për të qenë prezentë në një ditë ku parlamenti nuk mblidhet zakonisht, për të zhvilluar një seancë të jashtëzakonshme.
Dhe nga ana tjetër, paralel me këtë çështje, Komisioni Qëndror i Zgjedhjeve ka interpretuar ligjin duke konkluduar se afati për partitë që të regjistrohen nuk është 10 prilli (e hëna) siç është thënë deri tani, por e mërkuara.
Pra KQZ ka dhënë një afat të ri dyditor për të shpëtuar zgjedhjet e 18 qershorit.
Komisioni Qendror i Zgjedhjeve ka përgatiotur projektvendimin për ditën e hënë, ku nuk ekziston regjistrimi i partive të opozitës, pasi ai do të përgatitet për të mërkurën.
Ndërkaq Meta ka thirrur seancën pa asnjë konsultim me Ramën, por ka çuar njerëz tek opozita, ku njëri prej tyre ishte edhe Koço Kokëdhima që të marrë pjesë të martën në Kuvend.
Përveç votimit të komisioneve të Vettingut, ka shumë gjasa që të improvizuhet edhe një kërkesë për shkarkimin e qeverisë “Rama” përmes një mocioni mosbesimi, apo kërkesës së vetë Ramës për të kërkuar një mocion besimi.
Së paku kështu i është thënë Bashës. Madje i është përsëritur se nëse nuk vjen të martën, ai humb dy raste: për të garantuar ndërkombëtarët se PD është pro Reformës në Drejtësi, si dhe për të rrëzuar Edi Ramën, gjë që Ilir Meta e pret me shumë ankth.
Nard Ndoka, kreu demokristian, deklaroi dje se zgjidhjet për rrëzimin e Ramës janë ose mocioni në Kuvend ose ta lësh të bjerë vetë pas abstenimit të opozitës.
Ndërkaq, një deklaratë e deputetit të LSI-së të Dibrës, Përparim Spahiu, është dëshmi e klimës PS-LSI.
Spahiu flet në një mënyrë që të jep kuptimin se partia e Metës është në opozitë tashmë.
“Nuk e ndërtuan Rrugën e Arbërit dhe futën si kompensim hashashin në trojet e Arbërit! Ky është një dështim spektakolar! LSI do ta rikthejë Fondin e Zhvillimit, në një fond të vërtetë zhvillimi të të gjithëve! Sepse ne duam zhvillim dhe jo hashash!”, deklaroi Spahiu.
Pra ka shumë gjasa që si zgjidhje kushtetuese për “qeveri teknike apo besimi” të jetë mocioni në Kuvend për të formuar më pas një kabinet kujdestar.
Ndërkaq, SHBA e BE kanë bërë presion që të mbyllet menjëherë Vettingu dhe kjo çështje u intereson më tepër.
Mësohet se me negocimin ndërkombëtar është gjetur një zgjidhje për të shpëtuar Vettingun dhe 18 qershorin, por edhe për të justifikuar vendimin politik të Ilir Metës për të dalë me Bashën në koalicion parazgjedhor.
Shtetet e Bashkuara të Amerikës kanë dërguar prej mbrëmë në Tiranë një zyrtar të DASH, i cili pritet që të ketë takime gjatë ditës së sotme dhe të hënën.
Mësohet se bëhet fjalë për një diplomat të rëndësishëm por emri nuk është bërë ende i ditur.
Ndërkaq, ambasadori amerikan, i cili duket se nuk po aktivizohet ditët e fundit, e ka dhënë deklaratën e tij para dy javësh për çështjen e Vettingut kur tha se “ne presim zgjidhje të ekuilibruara nga kryetari i parlamentit dhe ky është rasti”.
Perëndimorët e kanë bërë të ditur se pavarësisht aritmetikave paraelektorale, nuk tërhiqen nga objektivi i Vettingut.
“E duam tani, dhe e duam para zgjedhjeve”, kanë theksuar disa herë.
Si dhe në korrik kur gjithçka u zgjidh në momentin e fundit, edhe këtë herë afati mbërriti në ekstrem për të shkuar të gjithë deputetët si “çeçua” kur thotë avokat Ngjela e të votojnë Vettingun. /tesheshi.com/
