Ndërsa në grupin parlamentar të PS-së ka nisur “festa” nga kundërshtarët e Koço Kokëdhimës për heqjen e mandatit të tij nga Kushtetuesja, Gramoz Ruçi ka bërë me dije se tërmeti do të nisë së shpejti dhe do të ketë sërish “viktima”, brenda mazhorancës por edhe opozitës.
Në mënyrë unanime ka ndodhur ajo që deri dje shikohej si e pamundur: PD-ja dhe PS-ja kanë bashkuar votat dhe kanë miratuar në parim reformën në drejtësi.
Ka qenë i menjëhershëm reagimi i ambasadës amerikane. Në një deklaratë të firmosur nga Dondal Lu, theksohet se ky vendim është i pazakontë.
“Ambasada e Shteteve të Bashkuara mirëpret vendimin e Komisionit të Posaçëm për Reformën në Drejtësi për të pranuar në parim draftin përfundimtar të ndryshimeve kushtetuese, të përgatitur sipas rekomanimeve të Opinionit Përfundimtar të Komisionit të Venecias. Mbështetja unanime për këtë vendim duhet t’i japë popullit shqiptar shpresën se tani udhëheqësit politikë janë të përkushtuar ndaj miratimit të kësaj reforme. Mbështetja unanime është e pazakontë në Shqipëri dhe ne e përgëzojmë Komisionin e Posaçëm për këtë hap të rëndësishëm përpara në reformën në drejtësi”, theksohet në deklaratën e ambasadës së SHBA-në Tiranë.
Por çfarë ndodhi 24 orët e fundit që gjithçka u shkri si kripa në ujë, ndërkohë që deri dje dukej sikur problemet ishin si një shkëmb i madh që nuk lëvizte?!
Burime të tesheshi.com brenda mazhorancës bëjnë të ditur se gjithçka ka qenë plan i detajuar i ndërkombëtarëve, madje edhe publikimi i vendimit të heqjes së mandatit për Koço Kokëdhimën.
Vendimi për Kokëdhimën është marrë prej kohësh dhe me një shumicë votash.
Në njoftimin zyrtar të Kushtetueses theksohet:
Gjykata Kushtetuese, pasi shqyrtoi dhe analizoi pretendimet e ngritura nga kërkuesi si dhe prapësimet e paraqitura nga subjekti i interesuar, në mbështetje të nenit 131/e të Kushtetutës, si dhe të ligjit nr.8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”,
VENDOSI:
– Konstatimin e papajtueshmërisë së mandatit të deputetit Koço Kokëdhima”.
Mësohet se ky vendim ka qenë një konçension i bërë ndaj opozitës që ajo të votonte reformën, meqë çështjen e mandatit të Kokëdhimës e ka pasur një nga kushtet për t’u kthyer në Kuvend.
Edhe pse është diçka absurde në thelb, mësohet se për këtë ka pasur edhe një pajtueshmëri nga vetë kryeministri Rama.
Ditën e shtunë dhe të dielë janë zhvilluar negociata shumë intensive nga diplomatët për të diskutuar se cilat do të ishin hapat që do të ndërmerren.
Ndërkohë, mazhoranca ka ngritur stekën e kërkesave në mënyrë që ndëshkimi të nisë edhe nga ana e deputetëve të Partisë Demokratike.
Gjithçka do të mësohet nga mbledhja që ambasadorët Lu dhe Vllahutin do të zhvillojnë deri në orën 15.00 me tre partitë kryesore parlamentare.
“Tani fillon fshesa”, tha një burim diplomatik; ndërkohë ambasadorja e BE-së Romana Vllahutin ka përmendur modelin kroat: “Ky është vetëm hapi i parë por jo ai më i vështiri”, deklaroi ajo pas votimit në Komisionin e Reformës. /tesheshi.com/
