Ruajtësi i portës dhe njëri ndër futbollistët më me përvojë të kombëtares serbe, Vladimir Stojkoviç, në një intervistë për gazetën “Alo” ka dhënë mesazhe lufte para ndeshjes me Shqipërinë në “Elbasan Arena”.
Stojkoviç tha se pas ndërprerjes së ndeshjes në Beograd të shkaktuar nga droni me flamurin e të ashtuquajturës Shqipëri e Madhe, jemi të përgatitur për gjithçka në Elbasan.
“Ekipi është mprehur për luftë dhe përleshje në ‘Elbasan Arena’, sepse vendasit janë të vetëdijshëm për të metat e lojtarëve të tyre dhe do të përpiqen me çdo mënyrë jo-futbollistike të marrin tre pikët. Ata do të përpiqen të na mundin prapë me dhunë, sepse janë të vetëdijshëm se nuk dinë dhe në terren nuk mund të na mundin. Kam parë ndeshjen e tyre në Danimarkë, janë përplasur me koka, por disi ua shkëputën një pikë. Luftojnë, kanë patriotizëm të shfaqur, por ne duhet t`ju përgjigjemi në mënyrë të ngjashme”, tha Stojkoviç.
“Shqiptarët tashmë e kanë filluar luftën speciale para ndeshjes. Filluan me arrestimin e serbit me dron në kufi (i cili përpiqej të bënte punën e tij dhe punonte për një organizatë turistike në Shqipëri) dhe vazhdoi me provokimet e lojtarit Andi Lila, i cili festoi golin ndaj Olimpiakosit duke e lartësuar Shqipërinë e Madhe. Do të japim gjithçka nga vetja, të kthejmë atë që na është marrë padrejtësisht në Beograd. Me siguri do të ketë edhe ndonjë sajesë në Elbasan, por tani jemi më të përgatitur dhe më me përvojë për shkak të asaj që ndodhi në terrenin tonë. Do të ketë gjithçka. Rrahje, grindje, shpime, goditje, por ne jemi të përgatitur. Kush del më i mençur nga kjo luftë, do të fitojë dhe ndeshjen”, vazhdoi Stojkoviç.
Portieri i Makabit nuk ka dilema se shqiptarët janë të gatshëm edhe për ndërprerje të re, nëse rezultati nuk u shkon përshtat: “Nuk do të më çudiste që të lëshojnë dhe dron me flamurin serb e të na akuzojnë se e kemi bërë ne”.
Stojkoviç ankohet se pse ‘shqiponjat’ nuk do të mund t`u japin goditjen e fundit shpresave të shqiptarëve, për të shkuar në Francë.
“Të gjithë duam t`ua prishim planet, t’i mundim dhe të mos shkojnë në Kampionatin Europian. Por ata, pas kësaj kanë edhe ndeshje në Armeni. Praktikisht atyre në dy ndeshje ju duhet një pikë, me kusht që Danimarka të mos fitojë me Portugalinë”, thekson më tej Stojkoviç për gazetën ‘Alo’.
Përgatiti: Endrita Shehu – tesheshi.com
