Petro Poroshenko, presidenti i Ukrainës, tha për BBC-në, “Mund të jem absolutisht i qartë me ju, se kjo nuk është një luftë me separatistët e mbështetur nga Rusia, kjo është një luftë reale me Rusinë.”
Udhëheqësi 49-vjeçar ukrainas deklaroi se kapja në fundjavë e dy anëtarëve të forcave speciale ruse tregoi se kryengritja separatiste në lindje të Ukrainës ishte një maskë për një fushatë të orkestruar nga Moska që synonte copëtimin e ish-shtetit sovjetik.
“Fakti që ne kapëm ushtarë të forcave speciale ruse është dëshmi e fortë e kësaj,” vijoi më tutje Poroshenko.
“Unë besoj se ata po përgatisin një ofensivë, dhe mendoj se duhet të jemi gati … të mos u japim atyre mundësi për provokim.”
Poroshenko pranoi se Ukraina nuk ishte aq e fuqishme sa t’i zmbrapste trupat ruse. “Dyshoj se lirimi i territorit tim mund të ngjasë me mjete ushtarake.”
Forcat ushtarake të Ukrainës treguan një ditë më herët dy rusë të plagosur, të marrë rob gjatë një shkëmbimi zjarri në Lugansk.
Dy rusët e lënduar dëshmuan se patën hyrë në zonën e luftës dy muaj më parë, si pjesë e një njësie zbulimi.
Moska nuk e mohon praninë e “vullnetarëve” rusë, por i hedh poshtë akuzat se ata janë nën urdhrat e gjeneralëve të Putinit.
Kapja dhe shfaqja e dy ushtarëve rusë para mjeteve botërore të informimit e ka indinjuar Kremlinin.
I menjëhershëm ka qenë reagimi i zëdhënësit të Putinit, Dmitry Peskov, ndaj deklaratave të Poroshenkos, duke bërë të ditur se Kremlini nuk pajtohet me ato çka udhëheqësi ukrainas i tha BBC-së.
Agjencia ruse e lajmeve citoi zëdhënësin të thotë se, “Para së gjithash, duhet kuptuar se, fatkeqësisht, Kievi po bën luftë kundër qytetarëve të vet.”
Kombet e Bashkuara besojnë se konflikti ka marrë më së paku 6.250 jetë njerëzish, dhe i ka nxjerrë më shumë se një milionë të tjerë prej shtëpive të tyre. /tesheshi.com/
