Me kërkesë nga SPAK, Policia e Shtetit ndërrmori një operacion “blic” në Nikël të Fushë Krujës, një fshat legjendar që njihet si vatër krimi.
Sipas një deklarate zyrtare, janë bastisur banesat e disa emrave të bujshëm të zonës, duke siguruar shumë prova materiale.
“Kontrolle në funksion të procedimit penal të ndjekur nga SPAK-u ndaj një grupi të strukturuar kriminal.
Kontrollet për sigurimin e provave që do t’i shërbejnë hetimit, të zhvilluara në zbatim të vendimit të Gjykatës së Posaçme të Shkallës së Parë Kundër Korrupsionit dhe Krimit të Organizuar.
Në operacionin e kontrollit të banesave në Nikël, Krujë, janë përfshirë Drejtoria Hetimore Qendrore në Drejtorinë e Përgjithshme të Policisë së Shtetit, Forcat Speciale Renea, Drejtoria e Forcës së Posaçme Operacionale, Drejtoria Vendore e Policisë Durrës e Drejtoria Vendore e Policisë Tiranë.
Gjatë operacionit të kontrollit, ku përdorën edhe dronë, janë zhvilluar kontrolle në 7 banesa, konkretisht:
Në banesat e shtetasve: Durim Bami, Valter Bami, Bedri Haka, Marklen Haka, Gentjan Koçi, Ylli Çangu dhe Ervin Kodra.
Gjatë kontrollit të banesave janë gjetur dhe sekuestruar prova materiale që do t’i shërbejnë hetimit në interes të procedimit penal”, thuhet në deklaratë pa u saktësuar se për ç’krime nën hetim bëhet fjalë.
Kujtojmë se një ndër vrasjet më të bujshme, ajo e bankierit Artan Santo më 2014, përflitet se i ka pikënisjet e ekzekutimit pikërisht në Nikël. /tesheshi.com/
