Burime të portalit tonë njoftojnë se policia e Kosovës dhe AKI-ja kanë parandaluar një atentat ndaj kryetarit të Gjykatës Themelore të Mitrovicës, Ali Kutllovcit.
Zyrtarë të policës së Kosovës në Mitrovicë as e kanë pohuar e as e kanë mohuar përgatitjen e atentatit ndaj Kutllovcit, por kanë deklaruar se kohët e fundit janë shtuar masat e sigurisë për personalitetet me rëndësi.
Duke iu referuar gjithmonë burimeve, Agjensioni Kosovar i Inteligjencës, AKI, në bashkëpunim me policinë e Kosovës kanë siguruar në rrugë operative një informacion se ndaj kryetarit të Gjykatës Themelore të Mitrovicës, Ali Kutllovcit, është përgatitur një atentat nga persona të përfshirë në vepra korruptive dhe në krim të organizuar.
Pas këtyre informacioneve, policia e Kosovës i ka shtuar masat e sigurisë për Kutllovcin, duke i mbikëqyrur çdo lëvizje gjatë 24 orëve, ndërsa është angazhuar edhe në ruajtjen e shtëpisë së tij.
Burimi ka saktësuar më tej se atentati ndaj gjykatësit dhe kryetarit të Gjykatës Themelore të Mitrovicës, Ali Kutllovcit, është përgatitur nga një person i burgosur, në një nga burgjet e Kosovës.
“I burgosuri që është i dyshuar për korrupsion dhe krim të organizuar ka angazhuar vrasës me pagesë për ta eliminuar gjykatësin mitrovicas,” ka thënë burimi. Duke shtuar se dyshohet që Kutllovci është kryetar i trupit gjykues në rastin e të burgosurit që ka përgatitur skenarin për vrasjen e tij.
Ali Kutllovci bën pjesë në gjeneratën e mesme të gjykatësve të Mitrovicës, dhe njihet në opinion si një gjykatës që gëzon respektin më të madh nga banorët, pasi është shumë autoritar dhe i pakorruptuar. Kështu e ka cilësuar të hënën Kutllovcin një gjykatës i Gjykatës Themelore të Mitrovicës me seli në Vushtrri, i cili ka folur për portalin pa dashur të paraqitet me emër.
Gjykatësi ka shtuar se, “kryetari (Ali Kutllovci) është kërcënuar me jetë pasi nuk ka pranuar dhe nuk pranon ndërhyrje nga lart gjatë gjykimit, dhe nuk ka fuqi që mund ta korruptojë atë”.
Nga ana tjetër, zëdhënësi i policisë për rajonin e Mitrovicës, Avni Zahiti, ka thënë në lidhje me këtë informacion se, “policia e Kosovës i ka shtuar kohë më parë masat e sigurisë për një numër personash me rëndësi të veçantë”. Zahiti nuk ka dashur të komentojë në bëhet fjalë edhe për kryetarin e Gjykatës Themelore të Mitrovicës, Ali Kutllovcin.
Eshtë tentuar të merret një deklarim rreth këtij rasti edhe nga Gjykata Themelore e Mitrovicës, por një gjë e tillë ka qenë e pamunduar.
Ndërsa ditë më parë, në qendër të pjesës jugore të Mitrovicës, katër persona të panjohur deri më tani i kanë vënë zjarrin makinës së prokurorit të Prokurorisë Speciale të Kosovës, Ali Rexhës. Policia nuk i ka identifikuar akoma autorët e kësaj zjarrvënie, edhe pse janë konfiskuar disa kamera sigurie ku duken zjarrvënësit me kokat dhe fytyrën të mbuluara me shall gjatë aktit kriminal. /tesheshi.com/
