Ish-sulmuesi i Këlnit, Bajernit të Mynihut, Arsenalit e Interit, e që tani luan për Gallatasarajin në kampionatin turk, ka bërë të ditur se do të kalojë në kampionatin japonez.
Vissel Kobe do të jetë skuadra e tij e re që prej 1 korrikut të këtij viti. Një transferim i paralajmëruar dhe për të cilin është punuar prej muajsh.
“Mund të pohoj se në fund të sezonit do të bashkohem me Vissel Kobe,” shkroi Podolski në Instagram. “Nuk është një vendim kundër Gallatasarajit. Eshtë një vendim i marrë për një sfidë të re, dhe do të shpjegoj më shumë në kohën e duhur.”
Podolski, tashmë 31-vjeçar, luan për të dytin sezon në Superligën turke, si pjesë e Gallatasarajit. Ndryshe nga shumë lojtarë të tjerë që kanë zgjedhur Kinën, ai ka vendosur të zhvendoset në Japoni.
Një fitues i Kupës së Botës me Gjermaninë, ai u tërhoq nga aktiviteti ndërkombëtar në fund të verës së 2016-s, pas 12 viteve me bluzën e përfaqësueses gjermane. Podolski shënoi 48 gola në 129 ndeshje të luajtura për Gjermaninë. /tesheshi.com/
