Një pikturë e rrallë, në të cilën ndodhen bashkë Enver Hoxha dhe Skënderbeu, është publikuar nga ish-kreu i arkivave në Ministrinë e Brendshme, Kastriot Dervishi.
Ai gjithashtu përmes rrjeteve sociale jep detaje si dhe bën një përshkrim rreth tablosë së veçantë të porositur nga ish-diktatori.
“Në vitet ’70, Komiteti Qendror i PPSH-së porositi një pikturë me sfond historik, të cilën e vendosi në një prej zyrave kryesore të tij. Në mënyrë simbolike, kjo pikturë pasqyron propagandën e regjimit komunist, sipas së cilit vetëm ai regjim po realizonte aspiratat shekullore të popullit shqiptar.
Diktatori i Shqipërisë kishte dëshirë ta lavdëronin në dy gjëra: se po bënte shtet (realisht një shtet i dështuar si në organizim dhe në funksionim), si dhe të gënjehej se ishte figura më e denjtë që i takonte të merrte shpatën e Skënderbeut.
Dy “stacione” të tjera historike përmendeshin vitet 1912 me pavarësinë dhe 1924 me grushtin e shtetit të këtij viti. Gjysmën e pikturës e zënë partizanët dhe shefi i tyre Enver Hoxha, por mungojnë këtu Miladin Popoviçi dhe Dushan Mugosha. Si rezultante e gjithë historisë së Shqipërisë dilte Enver Hoxha”, shkruan Dervishi në rrjetet sociale. /tesheshi.com/
