Beogradi ka përgatitur kundërofensivën pas pezullimit të Zajednicës. Këtë e ka bërë të ditur ministri për Kosovën në qeverinë serbe, i cili është cituar nga mediat e vendit të tij.
Siç bën të ditur Blic, qeveria serbe do t’i mbajë në të njëjtën formë, madje do t’i shtojë strukturat paramilitare në veri të Kosovës.
Ajo e ka bërë të qartë se do ta pengojë pranimin e Kosovës në organizatat ndërkombëtare, si pasojë edhe e bllokimit të “Zajednicës”, siç tashmë quhet Marrëveshja Beograd-Prishtinë për Asocacionin e Komunave me Shumicë serbe.
Ministri për kordinim për Kosovën, Marko Gjuriç, deklaroi se marrëveshja e Brukselit përcakton pjesëmarrjen në organizata rajonale.
Duke i dërguar një mesazh të fortë Prishtinës, Gjuriç tha se nuk ka asnjë alternative tjetër veç zbatimit të
marrëveshjes së Brukselit, edhe pse Prishtina është duke u përpjekur ta shtyjë ose ta pezullojë zbatimin e asaj për të cilën është rënë dakort.
“Marrëveshja duhet të zbatohet. Ne flasim çdo ditë me përfaqësuesit e institucioneve të Brukselit, dhe nuk shohim asnjë justifikim për faktin se Prishtina e ka vonuar zbatimin e marrëveshjes,” u shpreh ministri serb.
I pyetur nëse qeveria serbe po e shqyrton tërheqjen nga marrëveshja pas disa lëvizjeve të Prishtinës, ai ka thënë se Beogradi dëshiron t’i normalizojë vazhdimisht marrëdhëniet.
“Ne kemi arritur një marrëveshje që është në interes të popullit serb dhe shqiptar, për të krijuar kushte më të sigurta dhe më të përcaktuara të jetës. Kjo është e mundur vetëm përmes zbatimit të asaj për çka është rënë dakort,” tha Gjuriç.
Ai shtoi se së shpejti do të organizohet një takim tjetër në Bruksel në nivel ekspertësh.
“Serbia i ka në letër për t’i përmbushur të gjitha obligimet e veta sipas marrëveshjes së Brukselit,” deklaroi Gjuriç.
Sipas tij, Prishtina duhet të zbatojë marrëveshjen për policinë, sepse është ende i pazgjidhur statusi i rreth 120 ish-pjesëtarëve të Ministrisë së Brendshme serbe në Kosovë, që Prishtina thotë se nuk i kanë kaluar kontrollet e sigurisë.
Ndërkaq ministri serb bëri të ditur se Beogradi nuk do t’i transformojë “rojet e urës”, siç quhen strukturat e mbrojtjes civile që veprojnë në veri, matanë Ibrit.
Gjuriç shtoi se komuniteti serb në Kosovë dhe ata që e përfaqësojnë atë nuk kanë alternativë tjetër, veçse të veprojnë në unison.
“Unë flas çdo ditë me përfaqësuesit politikë të serbëve të Kosovës, dhe mendoj se sfidat me të cilat ata përballen çdo ditë kërkojnë përkushtim dhe punë politike, për t’i fuqizuar dhe për t’u siguruar këtyre njerëzve një perspektivë.”
Sipas Gjuriçit, deputetët e Listës Serbe dhe përfaqësues të komunitetit serb që marrin pjesë në institucionet e Kosovës do të udhëtojnë ditët e ardhshme në të gjitha zonat serbe në Kosovë, për t’i konstatuar të tëra problemet dhe kërkesat karshi qeverisë së Serbisë për vitin 2016.
Kosova, në dijeninë e tij, po planifikon një zgjerim agresiv të ndërtimit të banesave dhe të investimeve në infrastrukturë. /tesheshi.com/
