Kryetari i Grupit Parlamentar të LSI-së, Petrit Vasili, përmes një komenti në rrjetet sociale ka ironizuar Kryeministrin Edi Rama, duke e quajtur thjesht një turist, ndërsa i ka uruar pushime të mbara.
Referuar ngjarjeve të ndodhura në vend, qoftë përsa i takon zjarreve apo humbjes së jetëve njerëzore, Vasili shkruan se Edi Rama nuk denjon të reagojë me atë çfarë po ndodh.
Gjatë ditëve të fundit, LSI edhe pse vijon të jetë pjesë e Qeverisë deri në shtator, ka shtuar dozat e sulmit ndaj Kryeministrit, veçanërisht përsa i takon situatës së zjarreve.
Por në anën tjetër, të paktën 3 ministra të LSI-së, ai i Mjedisit, i Bujqëisë dhe i Transporteve, që edhe për shkak të specifikave të Ministrive që kanë drejtuar, duhet të reagonin në lidhje me zjarret që prej disa javësh kanë përfshirë pyje, vreshta apo të mbjella të tjera.
Komenti i Petrit Vasilit
Flakë në kodrat e Ardenicës.
Një 13-vjeçar humb jetën duke u mbytur në Velipojë pak çaste më parë. Vera më e rëndë për shqiptarët.
Bilanc i rëndë lufte: tragjedia e të mbyturve në plazhet shqiptare nuk ka të sosur dhe zjarret po shkretojnë vendin dhe pasuritë e qytetarëve.
Të gjithë qytetarët janë në ankth dhe dëshpërim të thellë për vendin. Vetëm kryeministri është i qetë dhe i pashqetësuar hiç në romantizmin e tij veror dhe nuk shpenzon asnjë fjalë, as për qokë, e jo më për drejtim shteti.
S’na mbetet gjë tjetër veçse t’i urojmë pushime të mbara.
Ç’lidhje ka ai në fund të fundit me këtë vend? Turist është.
Iku dikur, erdhi, do iki prapë dhe hallet akoma më të mëdha do t’ua lerë shqiptarëve pa u zgjidhur asnjërën. Të tjerat… do t’i marrë me vete. /tesheshi.com/
