Nga Donat Maloku
Përplasjet ndërmjet partive politike janë diç e zakonshme. Por, kur ato ndodhin përbrenda një partie, krijojnë hallakamë dhe përçarje edhe më të madhe, pasi dalin në shesh të ‘palarat’ e subjektit, ose anëtarëve të partisë së caktuar.
Kohëve të fundit në Kosovë, akuzat në mes zyrtarëve të një partie politike janë shpeshtuar.
Ditë më parë në partinë e ish-kryeministrit të vendit, Hashim Thaçi, Partinë Demokratike të Kosovës (PDK) , në drejtim të njëri-tjetrit hodhën akuza të mëdha dy zyrtarë të kësaj partie.
Ishte ish ministri Bajram Rexhepi akuzoi nënkryetarin e PDK-së, Kadri Veseli, se ka uzurpuar partinë si dhe institucionet e vendit. Ky i fundit u kundërpërgjigj se nuk ka karamela më për Rexhepin.
Një atmosferë jo e mirë dhe pakënaqësi të mëdha qëndrojnë edhe brenda Lidhjes Demokratike, gjithmonë duke mos harruar se deputetë të kësaj partie nuk votuan kryetarin e partisë së tyre, Isa Mustafën, për kryeministër. Një grup deputetësh të LDK-së, kryesisht në moshë të re, haptazi kanë shprehur pakënaqësinë ndaj lidhjes së koalicionit me PDK-në.
Plas dhe në ‘Vetëvendosje’…
Përplasjet që cekëm më lart, nuk janë të vetmet në partitë politike kosovare.
Me përplasje po përballet edhe partia e parë opozitare: Lëvizja ‘Vetëvendosje’.
Përçarja e fortë në Vetëvendosje nisi pasi kjo parti përjashtoi koordinatoren e saj për Komunën e Skenderajt, Ajnishahe Halimi.
Kjo e fundit ka akuzuar Kryesinë e VV-së se ka kapur dhe ngulfatur demokracinë brenda partisë me njerëz me ide marksiste –leniniste; madje duke mos kursyer në kritika dhe ish-liderin e këtij subjekti politik, Albin Kurtin, se e ka lënë në lloç.
Sipas saj, Kurti vazhdon të jetë lideri i Lëvizjes ‘Vetëvendosje’-s, ndërsa nga Visar Ymerin kërkon që t’i kapë “frerët” e partisë, për të dëshmuar se është kryetari. Për më tepër, Halimi e akuzoi ‘Vetëvendosje’-n se ka bërë keqpërdorime financiare, duke thënë se ndërtesën që kjo parti e shfrytëzon nuk paguan fare qira, por zyret i ka donacion.
Ndaj këtyre deklarimeve dy herë gjatë ditës së mërkurë, ka reaguar përmes kumtesave Lëvizja “Vetëvendosje”, duke i quajtur deklaratat e Halimit shpifëse, derisa ka prezantuar dokumente ku fakton se ka paguar qiranë.
Kjo parti thotë se Halimi është shkarkuar për shkak të keqpërdorimeve financiare të cilat i ka bërë gjatë kohës sa ka qenë koordinatore në atë qendër
Mushkolaj: Përjashtimi i Halimit, veprim i mjerë i VV-së
Përjashtimin nga Lëvizja ‘Vetëvendosje’ i koordinatores për Komunën e Skenderajt, Ajnishahe Halimi, disa zëra mediatikë e vlerësojnë si vendim arbitrar të LVV-së, duke shtuar se kjo parti nuk po del të jetë ashtu siç deklarohet para publikut.
Analisti Imer Mushkolaj, ka thënë për Telegrafin se Ajnishahe Halimi është simbol i gruas dhe politikanes së guximshme, të cilën do të dëshironte ta kishte në radhët e veta secili subjekt politik. “Përjashtimi i Halimit është një veprim i mjerë i VV-së, një poshtërsi e llojit të vet, një ‘shpërblim’ për gjithë punën që ajo ka bërë në rrethana aspak të lehta. Me këtë veprim, VV-ja po tregon se vetëm deklarativisht promovon debatin, ndërkohë që praktikisht zbaton diktatin”, ka thënë Mushkolaj. /tesheshi.com/
