Një takim i programuar midis Enrique Pena Nieto-s, presidentit të Meksikës, dhe Donald Trump-it, homologut amerikan, nuk do të kryhet. Në axhendë për t’u zhvilluar javën e ardhshme në Uashington, takimi është anuluar pas rindezjes së debatit për murin në kufirin mes SHBA-së dhe Meksikës.
Pena Nieto lajmëroi në Twitter se e kishte njoftuar Shtëpinë e Bardhë për mospjesëmarrjen në takimin e punës të lënë për të martën e ardhshme.
Kishte qenë vetë Trump-i që kishte deklaruar një ditë më parë se do të ishte më mirë që të anulohej vizita e programuar në Uashington e presidentit meksikan nëse vendi i tij nuk ishte i gatshëm të paguante për murin.
“Nëse Meksika nuk do ta trajtojë SHBA-në ndershmërisht, me respekt, një takim i tillë është i pafrytshëm, dhe unë dua të shkoj në një drejtim ndryshe,” do të thoshte Trump në një takim në Filadelfia me përfaqësuesit republikanë në Kongres.
“Siguria kufitare është një çështje serioze dhe një problem kombëtar. Pjesa më e madhe e emigracionit ilegal po vjen nga kufiri ynë jugor.”
Ndërkohë që Trump-i është i vendosur t’i shkojë në fund premtimit për të ndërtuar një mur në kufirin me Meksikën e për ta bërë këtë të fundit të paguajë për të, presidenti meksikan është tërësisht kundër kësaj iniciative.
“Meksika nuk beson në mure… Meksika nuk do të paguajë për asnjë mur,” kishte qenë reagimi i tij një ditë më herët teksa i qe drejtuar popullit meksikan me një fjalim televiziv.
Që prej hyrjes në Shtëpinë e Bardhë, Trump-i po përballet me të parën kundërvënie serioze ndaj planeve të tij. /tesheshi.com/
