Mariano Rajoy, kryeministri konservator i Spanjës, e ka cilësuar si katastrofë një fitore të mundshme të Marine Le Pen-it në zgjedhjet presidenciale në Francë apo të AfD-së në zgjedhjet e përgjithshme në Gjermani.
Gjatë një interviste për një radio spanjolle, Rajoy ka shprehur bindjen se kjo do ta shkatërronte Europën.
“As dua ta mendoj, se do të qe një katastrofë, që thjesht do të thoshte shkatërrimi i Europës.”
Marine Le Pen, udhëheqësja e Frontit Nacional, parashikohet të arrijë në balotazhin e zgjedhjeve presidenciale në Francë, më 7 maj, ku pritet që të humbasë, ndërkohë që AfD-ja, Alternativa për Gjermaninë, një parti kundër emigrantëve dhe euroskeptike, mendohet të hyjë në parlament për herë të parë në zgjedhjet e përgjithshme në Gjermani në muajin shtator.
“Eshtë thelbësore për të ardhmen e Europës që zgjedhjet në Francë dhe Gjermani të shkojnë mirë,” ka thënë gjatë intervistës kryeministri spanjoll.
“Le Pen ka bërë të njohur planet për një referendum. Ajo do që (Franca) ta lërë Europën, si të ishte Europa burimi i të gjitha të këqijave. Do doja që ta vizitonte pjesën tjetër të botës.”
Me afrimin e zgjedhjeve presidenciale në Francë, po shtohet shqetësimi për një rezultat që do të kishte pasoja mbi të ardhmen e BE-së. Mariano Rajoy është mes atyre që kanë shprehur shqetësimin për rezultatet e zgjedhjeve të ardhshme në një sërë vendesh europiane. /tesheshi.com/
