Dhjetë ditë bombardime në Halep, në provincën veriore të Sirisë, e më shumë se 250 civilë të vrarë, kanë sjellë shtimin e përpjekjeve diplomatike për një armëpushim edhe në këtë hapësirë.
Në fakt, prej javësh qe paralajmëruar një përgatitje e ushtrisë së regjimit sirian për të sulmuar Halepin, edhe pse në vend është ende në fuqi një marrëveshje për ndalimin e luftimeve.
Një gazetë siriane në krah të qeverisë lajmëroi të enjten e shkuar se po përgatitej një ofensivë për të rimarrë të tërë Halepin dhe provincën përreth.
Sekretari amerikan i Shtetit, John Kerry, ka udhëtuar drejt Gjenevës, ku do të zhvillojë bisedime me të dërguarin e OKB-së për Sirinë, Staffan de Mistura, si dhe me ministrat e Jashtëm të Arabisë Saudite dhe të Jordanisë.
Ndërkohë, SHBA-të kërkojnë nga Rusia që të ushtrojë presion mbi qeverinë siriane për t’i dhënë fund bombardimit pa dallim.
John Kerry pohoi se po bisedohej në mënyrë të drejtpërdrejtë me rusët. “Këto janë orë kritike. Ne kërkojmë bashkëpunimin e Rusisë.”
Zyrtarë rusë thanë të dielën se po i kërkonin qeverisë siriane ta përfshinte Halepin në armëpushimin e përkohshëm, tashmë në fuqi në Latakia dhe në rrethinat e Damaskut.
Vetëm pak ditë më parë rusët do të deklaronin diçka krejt tjetër, duke pohuar se nuk do ta nxisnin ushtrinë siriane t’i ndërpriste sulmet ajrore mbi Halep, duke pretenduar se ato kishin në objektiv grupet e papërfshira në marrëveshje.
Agjencitë ruse të lajmeve kanë cituar ushtarakun Sergei Kuralenko të thotë se, “Aktualisht ka negociata aktive për të vendosur një ‘regjim qetësie’ në provincën e Halepit.”
Situata në Halep raportohet të ketë qenë dje më e qetë në krahasim me ditët pararendëse. /tesheshi.com/
