Agjencia e Statistikave të Kosovës publikon të dhënat për vitin 2014, sipas të cilave kanë ndryshuar raportet tregtare. Kështu nuk është më Serbia partneri më i madh tregtar i Kosovës por janë vendet e Bashkimit Europian. Ndërkohë që në eksport, duke renditur vendet e Ballkanit, Shqipëria zë vendin e parë, ndërsa Serbia është në vendin e tretë.
Deficiti tregtar në vitin 2014 arriti në 2 miliardë e 137 milionë euro, ku edhe në ketë vit ka bilanc negativ. Totali i eksporteve në këtë vit ishte 324,5 milionë euro, ndërsa importi 2, miliardë e 538,3 milionë euro. Eksporti mbulon importin për vetëm 12.8%.
Duke krahasuar të dhënat e eksportit për vitin 2014, me ato të vitit 2013, eksportet e mallrave kanë shënuar rritje vjetore 10.4%. Përbërësit kryesor të eksportit në vitin 2014 janë: produktet kimike 25.9%, ushqimi dhe kafshët e gjalla 22.9%, mallrat e përpunuara 18.9%, makineritë dhe pajisjet e transporti 17.3%, materiali i papërpunuar 5.1%, mallra të tjera të përpunuara 0.6%. Rënie është shënuar te këto grupe të mallrave: yndyrat bimore dhe shtazore -56.5%, lëndët djegëse -24.2%, pije dhe duhan -6.6%.
Importi në vitin 2014, krahasuar me vitin 2013, ka shënuar rritje vjetore 3.6%. Përbërësit kryesor të importeve janë: mallra të pa klasifikuara diku tjetër të cilat u rriten 55.1%, mallrat të tjera të përpunuara 16.8%, makineritë dhe pajisjet e transportit 8.4%, ushqimi dhe kafshët e gjalla 7.1%, pijet dhe duhani 3.5%, materialet e papërpunuara 2.5%, produktet kimike 2.4%. Rënie është shënuar te grupi i yndyrave bimore dhe shtazore -3.8%, lëndët djegëse -3.0% dhe mallra të përpunuara -2.0%.
Lidhur me eksportin dhe importin e Kosovës, partner kryesor tregtar janë vendet e BE-së, me pjesëmarrje 30.2% për eksport dhe 42.6% për import, si dhe vendet e CEFTA-s, të cilat marrin pjesë me 39.2% për eksport dhe 28.4% për import, në raport me totalin e vitit 2014.
Për sa i përket eksporteve të Kosovës me vendet ballkanike, Shqipëria merr pjesë me 13.6%, Maqedonia me 11.1%, Serbia me 8.4%, Mali i Zi 5.0%, në raport me totalin e vitit 2014, ndërsa pjesëmarrjen më të madhe të importeve në Kosovë nga vendet ballkanike e kanë Serbia me 14.5%, Maqedonia me 5.5%, dhe Shqipëria me 5.3%. /tesheshi.com/
