Është përkujtuar sot masakra e fshatit Luboten të Shkupit, ku policia maqedonase, në vitin 2001 vrau 10 shqiptarë në një operacion dhune e terrori.
Banorët e fshatit u shprehen të zhgënjyer nga harresa dhe neglizhenca e autoriteteve për të vënë drejtësi.
“Asgjë nuk ka ndryshuar si më parë, jemi të harruar dhe të persekutuar. Nuk kemi as rrymë e as rrugë. Ngjarja e vitit 2001 na përkujton ato ditë kur Luboteni, përjetoi ditët më të këqija në krye me kriminelin Johan Tarçulovskin që e bëri atë masakër. Johan Tarçullovski për lubotenasit është një kriminel dhe bandit nga më të pamëshirshmit. Ka ndryshime të vogla pak, por jo sa duhet”, thekson një banor i Lubotenit.
Johan Tarçullovski është një prej drejtuesve të forcave speciale të policisë, i cili është dënuar nga Gjykata e Hagës për krime lufte, ku u gjykua së bashku me ish-ministrin e Brendshëm, Ljube Boshkovski.
Banorët e Lubotenit shprehën pakënaqësi pasi janë harruar edhe nga ish-drejtuesit e Ushtrisë Çlirimtare Kombëtare, sot përfaqësues të qeverisë.
“Asgjë s’ka ndryshuar, familjet e dëshmorëve durojnë ato kanë në hyrë në punë, ndërsa mua që më janë vrarë vëllezërit nuk pyet kush”, thotë një banor tjetër për televizionin Alsat M.
14 vjeçari Kadri Jashari, mban emrin e babait të vrarë në masakrën e Lubotenit. Kadriut iu deshën shumë vite, derisa i tejkaloi të gjitha vuajtjet që pas braktisjes nga nëna e tij menjëherë pas lindjes.
Në Luboten sot qëndruan ministra dhe zyrtarë të tjerë të BDI-së. Nga operacioni ushtarak në fshatin Luboten më 12 gusht të vitit 2001 mbetën të vrarë 10 civilë shqiptarë, në mesin e tyre edhe 6 vjeçari Erxhan Aliu si dhe Dalip Murati, Muharrem Ramadani, Memet Memeti, Rami Jusufi, Xhelal Bajrami, Kadri Jashari, Bajram Jashari, Sulejman Bajrami e Atulla Qaili. U dogjën 14 shtëpi, u arrestuan dhe keqtrajtuan mbi 100 banorë të fshatit, me arsyetimin se në fshat ishin të pranishëm pjesëtarë të UÇK-së.
Ngjarja e Lubotenit ishte një ndër rastet e vetme që u procedua dhe u gjykua nga Gjykata Ndërkombëtarë për Krime Lufte, me ç’rast për krimet e kryera ndaj civilëve shqiptarë u dënua ish-pjesëtari i lartë i forcave të sigurisë maqedonase, Johan Tarçullovski, tani bashkëpunëtor i ngushtë i kryeministrit Nikolla Gruevski. i akuzuari i parë ish- ministri i Brendshëm, Lube Boshkovski u lirua nga akuza. Johan Tarçullovski u dënua nga Gjykata e Hages me 12 vjet burg për vrasje, shkelje të ligjeve të luftës, torturë dhe shkatërrim të pronës, por ai tani ndodhet në liri pas 8 viteve të kaluara në burg. Lirimi i parakohshëm i Tarçullovskit, ardhja e tij me avionin qeveritar dhe pritja e tij si hero, u vlerësua si vrasje e dytë për familjarët e 10 lubotenasve të vrarë.
/tesheshi.com/
