Partia Demokratike ka folur edhe një herë sot për çështjen e pajisjes së përgjimit, ndërsa ka akuzuar kreun e qeverisë, Edi Rama se po pengon hetimet. Sekretari i Përgjithshëm i PD-së, Arben Ristani, i bëri thirrje prokurorisë që të vijojë hetimet dhe të mos tërhiqet nga të tilla shantazhe.
“Pajisja e përgjimit të paligjshëm është përdorur në zonat pranë Prokurorisë së Përgjithshme, në Rrugën e Elbasanit, pranë Televizionit Publik dhe pranë Bashkisë së Tiranës. Të paktën këto katër lëvizje janë dokumentuar, siç bën të ditur media që i referohet një raporti sekret të SHISH, raport që i është dorëzuar Presidentit, Kryeministrit dhe Prokurorit të Përgjithshëm”, – tha Ristani.
Sipas tij, kjo është arsyeja pse Edi Rama e pengon hetimin, pse e riktheu Çakon në detyrë duke shantazhuar në mënyrë mafioze gjykatën.
“Ky krim i rëndë shtetëror duhet hetuar e zbardhur deri në fund. Partia Demokratike i bën dhe një herë thirrje Prokurorisë së Republikës, të mos tërhiqet nga presionet e kërcënimet banditeske, po ti shkojë deri në fund kësaj çështje, që krime të tilla të mos ndodhin më në vendin tonë”, – tha ndër të tjera Sekretari i Përgjithshëm i PD-së. /tesheshi.com/
