Gjyqtari Engert Pëllumbi, ndër më të ndershmit në sistemin e drejtësisë, pa asnjë dritëhije, asnjë njollë, me plot integritet profesional e moral, njëherësh një besimtar musliman shembullor, është gjendur këto orë nën një sulm të vazhdueshëm nga zëra opozitarë, trushkulur me nam, si shkak i një vendimi mbi Berishën, i cili do detyrohet të paraqitet në SPAK dy herë në muaj. Është një sulm i paprinciptë që udhëhiqet nga vetë Berisha, njeriu që përkundër ish-profesionit të tij si mjek, prek dhe nivelet e antinjerëzores kur është fjala për sulme politike. Është thjesht pa pikë mëshire ndaj kundërshtarëve apo atyre që nuk i vijnë pas avazit.
Për sulmet ndaj gjyqtarit në fjalë, një kritik i ashpër ndaj Berishizmit, nga pozita e një demokrati, Namik Lapardhaja, e gjen në Ku’ran përgjigjen ndaj Berishës.
Ja ç’shkruan ai:
“‘Mjerë për secilin që ofendon e përqesh (njerëzit),
Që ka tubuar pasuri dhe që atë e ruan të mos i pakësohet.
E mendon se pasuria e tij do ta bëjë të përjetshëm…’
Këto versete kuranore m’u kujtuan kur pashë gjuhën bullizuese ndaj gjyqtarit Engert Pëllumbi fill pas vendimit të sotëm.
Të ofendosh dhe të bullizosh tjetrin për shkak të pamjes fizike, jo vetëm që nuk është njerëzore, por është edhe e dënueshme.
Janë të njëjtët që i shan e i pështyn, i telendis e veç sa nuk i rreh Rama sa herë që u shkon në Kuvend dhe ata para tij bëjnë atë që Berisha ua ka mësur më mirë se gjithçka tjetër, të rrinë sus-majmun para tij.
Është e kuptueshme arsyeja pse reagojnë në atë mënyrë, sepse sa më i madh halli, aq më e rëndë gjuha linçuese, mirëpo askush nuk i ndihmon dot në ankthet dhe paranojat e tyre, që vijnë si pasojë e frikës së humbjes së pasurisë dhe pushtetit.
Frikërat e tilla i kanë vetëm ata që e dinë se si e kanë vënë pasurinë dhe se si e marrin lekun dhe shpresojnë se do të jenë të përjetshëm”, shkruan Lapardhaja, po ashtu besimtar musliman.
Është ky një aspekt që duhet ta bëjë të ndihet kaq së paku të bijën e Berishës, Argitën, më afër besimit në atë familje. Por koha ka treguar se në dramën e Berishës është dhe ajo që ai nuk ka një zë në rrethin e afërt familjar që t’i thotë “boll”. /tesheshi.com/
