Nën akuzën “cenim terrorist të rendit kushtetues dhe sigurisë”, Gjykata Penale e Shkupit ska shqiptuar masën e paraburgimit për deputetët e VMRO-DPMNE-së, Luben Arnaudov, Kërsto Mukovski dhe Sasho Vasilevski, ndërsa masën e arrestit shtëpiak për deputeten, Zhaklina Peshevska dhe deputetët, Johan Tarçullovski dhe Ljupço Dimovski.
Para hyrjes në Gjykatë, deputeti Kërsto Mukovski, të cilit tani më i është shqiptuar masa e paraburgimit, vlerësoi se nuk ekzistojnë argumente për akuzën për të cilën ngarkohet.
“Siç e shihni, në çdo kohë jemi në dispozicion të gjykatës. Parë juridikisht, ne mendojmë se nuk ka argumente për paraburgim, megjithatë gjykata le të vendosë. Besojmë në të”,- u shpreh Mukovski.
Pas vendimit të gjykatës, me pranga në dorë u transportuan në burgun hetues në Shutkë.
Gjashtë deputetët e VMRO DPMNE-së, që ishte në pushtet deri në qershor të këtij viti, akuzohen se i kanë ndihmuar protestuesit për të pushtuar Kuvendin e Maqedonisë, gjatë protestave të dhunshme, ditën e zgjedhjes së kryeparlamentarit, Talat Xhaferi.
Për këtë vepër, janë akuzuar gjithsej 36 persona, disa prej të cilëve janë dërguar në paraburgim javën e kaluar. Në mesin e tyre është edhe ish-ministri i brendshëm, Mitko Çavkov. Ai akuzohet se ditën kritike si drejtor i Byrosë së sigurimit publik, nuk ka dhënë urdhër për intervenimin e policisë në parandalimin e pushtimin të institucionit ligjvënës.
Njoftimi deri te Gjykata Penale nga Kuvendit për heqjen e imunitetit të gjashtë deputetëve arriti të hënën, pas çka u krijuan kushte që të veprohet rreth propozimit të prokurorisë. Gjashtë deputetët janë pjesë e 36 personave të cilët Prokuroria Themelore Publike i përndjek për “cenim terrorist të sistemit kushtetues dhe të sigurisë” lidhur me ngjarjet e 27 prillit të këtij viti në Kuvendin e Republikës së Maqedonisë. /tesheshi.com/
