Dy qytetet më të mëdha, Prishtina e Prizreni në katër vitet e ardhshme do të udhëhiqen nga Lëvizja Vetëvendosje.
Shpend Ahmeti i Vetëvendosje-s përfundimisht ka fituar mandatin e dytë si kryetar i Prishtinës pasi ka dalë fitues edhe nga numërimi i votave me “kusht”, atyre me “postë” dhe votave të personave me aftësi të kufizuara ndaj Arban Abrashit të LDK-së.
Ahmeti ka marrë 861 vota kurse Abrashi 733 vota, kurse fletëvotime të pavlefshme janë 18 ndërsa 3 të zbrazëta.
Në raundin e balotazhit Ahmeti kishte marrë 41 mijë e 401 kurse kundërkandidati nga LDK Arban Abrashi kishte 41 mijë e 164.
Fitues ka dalë edhe Mytaher Haskuka në Prizren edhe pse nuk i fitoi shumicën e votave me “kusht”, me “postë” dhe atyre të personave me aftësi të kufizuar.
Totaj i PDK-së morri 452 vota, ndërsa 385 Haskuka i VV-së.
Por pavarësisht kësaj në rezultatin paraprak Haskuka printe me 329 vota ndaj Totajt dhe diferenca e votave me “postë” dhe me “kusht” nuk e nxjerr fitues kandidatin e PDK-së.
Nga rezultatet preliminare të publikuara në faqen e KQZ-së, të votave të rregullta të balotazhit, Haskuka ka pasur 25 mijë e 509 vota, kurse kundërkandidati i tij nga PDK, Shaqir Totaj kishte 25 mijë e 180 sosh, pra me dallim prej 329 vota. /tesheshi.com/
