Në playoff-in e Euroleague-s, Fenerbahçe, Laboral dhe CSKA e Moskës e patën siguruar prej ditësh kualifikimin e tyre për në finalet e Berlinit.
Të tre ekipet do të fitonin 3-0 në serinë e ndeshjeve ndaj kundërshtarëve të tyre, përkatësisht ndaj Realit të Madridit, Panathinaikosit dhe Crvena Zvezdës.
I vetmi çift që do t’i çonte gjer në fund pesë sfidat e mundshme të playoff-it ishte Lokomotiv Kuban – Barcelona.
Pas një barazimi 2-2 në serinë e takimeve, Lokomotiv Kuban ia ka dalë të fitojë mbrëmë në fushën e vet 81-67 ndaj spanjollëve të Barcelonës. Lokomotiv Kuban shkon për herë të parë në finalet e Euroleague-s, e bëhet skuadra e dytë ruse e Final Four-it për këtë sezon.
Lokomotiv Kuban kryesoi mbrëmë në të dy dhjetëminutëshat e parë, 26-21 dhe 24-18. Për të lëshuar terren në fraksionin e tretë të lojës, kur edhe humbi 8-23. Rezultati i përgjithshëm do të ishte në favor të katalanasve në fund të këtij dhjetëminutëshi, 58-62. Rusët gjetën forca të reagonin e të kundërpërgjigjeshin në minutat e fundit të lojës, duke e mbyllur minipjesën e katërt në epërsi të thellë, 23-5. Për të ardhur te fitorja 81-67, që u dha kualifikimin.
Në Final Four, në Berlin, dy gjysmëfinalet e 13 majit do të jenë këto: Fenerbahçe – Laboral dhe CSKA e Moskës – Lokomotiv Kuban Krasnodar. Në finalen e dy ditëve më pas, më 15 maj, e sigurt është që do të ketë një ekip rus, pas përplasjes së dy të tillëve në gjysmëfinale. /tesheshi.com/
