Turneu i dytë vjetor Grand Slam i tenisit botëror ka ardhur në fazën e fundit të tij. Në French Open janë mësuar emrat e finalistëve, si për meshkuj dhe për femra.
Tërheqja e nëntë herë kampionit të Roland Garros-it, Rafa Nadal-it, oraret e kalendarit të ndryshuara për të disatën herë për shkak të shiut, aq sa sollën të hënën dhe ndërprerjen e plotë të veprimtarisë, gjë që ndodhte pas 16 vitesh, janë ato që mund të përshkruhen si gjërat më pikante të këtij turneu.
Për të ardhur te finalet. Te meshkujt do të kemi një kampion të ri të dielën, sido që të vijë puna. Serbi Djokovic dhe britaniku Murray do të ndeshen me shpresën për ta fituar për herë të parë këtë Grand Slam.
Djokovic ka qenë tre herë në finale, por asnjëherë nuk ka mundur të fitojë. Sot serbi ka mundur pastër në gjysmëfinale, 3-0, austriakun Dominic Thiem. Setet e fituara 6-2, 6-1 dhe 6-4 tregojnë për dominimin e plotë të tij, që mezi pret të bëhet fitues i këtij turneu.
Murray, në të kundërt, e ka finalen e tij të parë. Ai sot ka fituar në gjysmëfinale ndaj Wawrinka-s, kampionit në fuqi. 3-1 ka përfunduar ndeshja për britanikun, pasi ka kaluar nëpër faza interesante.
Te femrat, finalja është Serena Williams – Muguruza. Tenistja amerikane ka mundur në gjysmëfinale holandezen Bertens. 2-0 ka qenë rezultati përfundimtar, por takimi ka qenë mjaft i ekuilibruar. Me të njëjtin rezultat, 2-0, Muguruza ka dalë triumfuese ndaj australianes Samantha Stosur.
Finalja e femrave do të zhvillohet të shtunën, në orën 15:00. Një ditë më pas, në të njëjtën orë, do të jetë finalja e meshkujve. /tesheshi.com/
