Fati deshi që në kuadër të EHF Challenge Cup ekipit ferizajas “Kastrioti” t`i bije në short në skuadër serbe. Ekipi “Radniçki” nga Kragujevci me 10 ose 11 tetor do ta vizitojë Kosovën, përkatësisht palestrën e sporteve “Bill Klinton” në Ferizaj.
Sipas zyrtarëve ferizajas nuk ka problem nëse ndeshja zhvillohet në Ferizaj, mirëpo për ta një terren neutral do të ishte më i përshtatshëm në mënyrë që t`i evitojnë ekseset e mundshme.
“Qëndrimi i klubit është që ne e dëshirojmë një terren neutral, megjithëse ky vendim nuk është në kompetencat tona”, thuhet në faqen zyrtare të klubit.
Ndryshe nga kosovarët, pas tërheqjes së shortit serbët e kanë vlerësuar ndeshjen me specifika “rrezikshmëri e lartë”, pasi është takimi i parë i skuadrave nga Kosova dhe Serbia që nga lufta e fundit e vitit 1999.
Mirëpo, për të gjitha rastet skuadra ferizajase është duke i bërë përgatitjet pavarësisht se ku zhvillohet ndeshje dhe kërkojnë kualifikimin në turin tjetër. /tesheshi.com/
