Partia Demokratike e Kosovës, dega në Prishtinë, akuzoi Shpend Ahmetin se ka humbur mbi 100 milionë euro për shkak të paaftësisë, keqmenaxhimit dhe keqplanifikimit të buxhetit të kësaj komune.
Anëtari i Asamblesë së PDK-së në Prishtinë, Muhamet Selmani, në një konferencë për mediat, tha se nëse analizohet buxheti i planifikuar në këto katër vjet, shihet se Ahmeti gjatë tërë kohës i ka shërbyer vetëm partisë së tij, apo siç ka thënë bandave kriminale të Vetëvendosjes dhe jo qytetarëve të Prishtinës.
“Komuna e Prishtinës, për këto 4 vjet ka pasur në dispozicion një buxhet për 305.52 milionë euro, ndërsa ka arritur të realizojë vetëm 204.47 milionë euro, duke bërë kështu që kryeqyteti të mbetet pa 101 milionë investime kapitale dhe shërbime të tjera. Nëse një kryetar komune dështon t’i realizojë 101 milionë euro investime që vetë i ka planifikuar, atëherë ky nuk ka sesi të quhet ndryshe përveçse një kryetar i dështuar, ku dembelisë së tij ia kanë parë sherrin të gjithë qytetarët e Prishtinës”, u shpreh ai.
Edhe nëse analizohen të ardhurat e Komunës së Prishtinës, që ishin të planifikuara në këto 4 vjet, Selmani tha se shihen humbje milionëshe si pasojë e paaftësisë, menaxhimit dhe planifikimit të keq.
“Vetëm nga të ardhurat, humbjet e shkaktuara nga keqqeverisja e Vetëvendosjes, kapin shumën prej 30.88 milionë euro për tre vjet e gjysëm. Ne shpresojmë që kjo humbje të zbutet në këta muaj të mbetur, mirëpo ajo që është e pakthyeshme, si rezultat i qeverisjes së bandave të Vetëvendosjes, është se Prishtina vetëm në tre vjetët e kaluar ka humbur rreth 20 milionë euro, plus me humbjet e këtij viti ato po kapin shumën mbi 30 milionë”, ka thënë ai.
Selmani, më tej tha se për katër vjet qeverisje, Ahmeti planifikoi edhe 141.79 milionë euro investime të ndryshme në projekte kapitale, që nuk i realizojë kurrë, sepse ato ishin plane e projekte të tij vetëm sa për t’i mashtruar qytetarët.
“Nga këto plane, ai realizoi vetëm 66.50 milionë euro investime, ndërsa i la pa i investuar gjithsej 75.28 milionë euro të këtyre projekteve. Pra, më shumë i la pa investuar, se realizoi projektet e planifikuara kapitale. Këto dështime, nuk duan komente më shumë, sepse po flasin vetë shifrat e tyre”, ka thënë ai.
Paratë e këtyre projekteve të parealizuara, sipas Selmanit, kanë shkuar në financimin e bandave të Vetëvendosjes dhe aktiviteteve të tyre kriminale.
Selmani është marrë edhe me parkun afër palestrës “1 Tetori” dhe çerdhet, me të cilat mburret qeverisja e Ahmetit, për të cilat ka thënë se parku nuk është financim i komunës, por i Helwetasit zviceran, kurse për çerdhe, janë realizuar 392 mijë euro, ndërsa kishte planifikuar 1 milionë. /tesheshi.com/
