Nënkryetari i PDK-së, Enver Hoxhaj, pas mbledhjes të kryesisë së kësaj partie, ka konfirmuar edhe njëherë se kandidat i vetëm për kryetar të Kuvendit nga PAN është Kadri Veseli dhe se ai mund të tërhiqet vetëm nëse Vetëvendosje dhe LDK me aleatët do të votojnë Haradinajn për kryeministër.
Hoxhaj ka shtuar se partia e tij nesër në takimin konsultativ me partitë do të marrë vendim nëse do të marrë pjesë në seancën e radhës konstituive të thirrur nga Adem Mikullovci.
“Nesër në takim me subjektet politike do të bisedojmë për të arritur konsensus për seancën. Koalicionit PDK-AAK-Nisma i takon propozimi për kryetar të Kuvendit dhe ne e kemi kandidatin, që është kryetari Kadri Veseli”, ka thënë Hoxhaj.
Në këtë takim, Vetëvendosje ka bërë të qartë se nuk merr pjesë, ndërsa ende nuk ka një qëndrim të LDK-së me aleatët.
Ndërkaq Mikullovci u ka bërë apel të gjitha partive të institucioneve të marrin pjesë në seancën e së enjtes dhe t’i hapet rrugë formimit të institucioneve. /tesheshi.com/
