Kryeministri Isa Mustafa javë më parë paralajmëroi riformatimin e qeverisë, por e gjitha mbeti veç në kuadër të deklaratave pasi ende nuk ka ndodhur një gjë e tillë.
Duke parë neglizhencën e kryeministrit, kreu i PDK-së Kadri Veseli në një konference për media ditë më parë, bëri të ditur se Enver Hoxhaj do të zërë pozitën e ministrit të Jashtëm, vend që e la bosh Hashim Thaçi, presidenti aktual i Republikës.
Deklarimi i Veselit nga zyra e PDK-së për emërimin e Hoxhajt në vend të Thaçit, është një sinjal i qartë se ndryshimet në qeveri bëhen kur të vendos PDK-ja, e jo kur dëshiron kryeministri Mustafa.
Pas emërimit të Hoxhajt në pozitën e ministrit, zëdhënësi i Partisë Demokratike të Kosovës, Blerand Stavileci, tha se riformatimi i Qeverisë nuk është urgjencë, por është proces i vazhdueshëm që Qeveria të ketë sa më shumë suksese, duke shtuar se PDK i ka ofruar vendit qetësi, stabilitet dhe legjitimitet. Këto deklarata Stavileci i bëri në një konferencë e sotshme për media.
Në lidhje me riformatimin e Qeverisë dhe koalicionit qeverisës, Stavileci tha se të dy kryetarët e koalicionit qeverisës, Kadri Veseli dhe Isa Mustafa nuk është se vetëm brenda një dite do të bisedojnë për ndryshime në këtë koalicion.
“Për sa i takon koalicionit qeverisës dhe mundësive të ndryshme të riformatizimit nuk ka ndonjë urgjencë. Pra, për këtë punë sigurisht se kryetari Veseli se bashku me kryetarin e partisë tjetër, me kryeministrin me të cilët jemi në koalicion dhe subjektet tjera , nuk është se vetëm brenda një dite apo brenda një akti do t ë bisedojnë për çështje të rëndësishme sa i takon koalicionit. Por, ky është një proces i vazhdueshëm dhe sigurisht që kohë pas kohe, vazhdimisht do të ketë rifreskime në kuptimin jo vetëm të njerëzve, të strukturës njerëzore, por edhe të proceseve, të strukturës së proceseve, në mënyrë që të kemi sa më shume rezultat në kuadër të kësaj qeverisje”, tha Stavileci.
/tesheshi.com/
