Si në rastin e Valdrin Pjetrit, duke ndjekur të njëjtën praktikë, PD ofroi për publikun një dokument kompromentues për Agim Kajmakun, kreun e ri të Bashkisë së Vorës nga PS.
Sipas Sekretarit të Përgjithshëm demokrat Gazmend Bardhi, dokumenti tregon se Kajmaku ka një çështje të hapur penale në shtetin grek.
“Agim Kajmaku, alias Jorgo Toto, është arrestuar në flagrancë në shtetin grek në Jananin në 14 janar 2003, për përdorim dhe shpërndarje të karmonedhave të falsifikuara, është arrestuar në flgarancë, duke u arratisur nga shteti grek. Ka përdorur identitetin e rremë gjatë një transaksioni për fidanë.
Është marrë në pyetje, ka qendruar disa ditë në burg. Oficeri ka vendosur që hetimet të bëhen në masën ‘detyrim paraqitje’. Pasi dosja është përcjellë në prokurori, është konstatuar se jemi në nivel të krimit të shkallës së parë, dhe rezultonte e provuar që krimi ishte kryer nga Agim Kajmaku, alias Jorgo Toto.
Sipas prokurorisë greke duhej të dënohej në jo më pak se 10 vjet burgim. Prokuroria ka kërkuar arrestimin, gjykata ka pranuar kërkesën dhe ka vendosur marrjen të pandehur të Kajmakut për falsifikim parash dhe dërgimin e çështjesh për gjykim”, tha Bardhi.
Por sipas tij, më pas Kajmaku është arratisur nga Greqia e ardhur në Shqipëri, duke e lënë çështjen pezull.
“Vendimi i gjykatës nuk është ekzekutuar, pasi gjatë periudhës së hetimit ai është arratisur dhe ka ardhur në Shqipëri. Këtu ka ndryshuar emrin nga Jorgo Toto në Agim Kajmaku. Gjykata ka vendosur pezullimin e gjykimit derisa ai të arrestohet apo t’i gjendet një adresë e saktë për komunikimin e akuzës. Për këtë vepër, ai duhet të jetë vetë i pranishëm në gjykim”, tha Bardhi.
Pritet tashmë se çfarë reagimi do ketë vetë i akuzuari Agim Kajmaku, apo dhe kryeministri Rama, i cili në rastin e Pjetrit u distancua menjëherë nga ky i fundit. /tesheshi.com/
