Partia Demokratike po tenton të karikojë elektoratin e saj lidhur me protestën e paralajmëruara të 18 shkurtit, që do jetë dhe starti i një reagimi të ri opozitar në prag të zgjedhjeve të qershorit. Këtë të dielë, PD përdori rastin e Elvis Roshit, kreut të Bashkisë së Kavajës, që sipas saj vijon ende në detyrë, nën mbrojtjen e Ramës, si një arsye plus se përse duhej protestuar.
“Më 29 dhjetor të vitit të kaluar, KQZ zbatoi urdhërin e prokurorisë për t’i hequr mandatin Elvis Rroshit, bazuar në ligjin e dekriminalizimit, dhe pas kësaj doli një vendim qeverie që e shkarkonte atë nga detyra e kryetarit të Bashkisë së Kavajës. Por dje, ministri i financave i Edi Ramës, jo vetëm shfaqet me përulësi e respekt para Elvis Rroshit, në një aktivitet politik në Kavajë, por e cilëson atë publikisht kryetar Bashkie. Edi Rama del kështu kundër qytetarëve, kundër institucioneve, kundër kërkesës së Europës, dhe mbron krimin deri në fund. Me veprimin e tij, Edi Rama e ka bërë zero përpjekjen e mundimshme të opozitës e partnerëve ndërkombëtarë dhe vullnetin e popullit për hartimin dhe zbatimin e ligjit të dekriminalizimit. Kjo është një tjetër dëshmi se Edi Rama nuk ndahet dot nga krimi. Nuk ndahet dot nga trafikantët dhe droga. Prandaj nuk e do votimin dhe numërimin elektronik. Sepse kështu nuk e ndihmon dot, as ai krimin, as krimi atë. Zgjedhjet e lira janë fundi i krimit në politikë. Ndaj, më 18 shkurt ne ngrihemi bashkë për t’i prerë rrugën krimit në politikë, për t’i dhënë mundësinë shqiptarëve të zgjedhin të lire qeverisjen e tyre”, deklaroi kreu i grupit parlamentar të PD-së, Edi Paloka. /tesheshi.com/
