“Me fitimet kolosale të trafikimit të kanabisit është financuar dhe blerja masive e votës anembanë vendit në zgjedhjet e 25 qershorit”. Kështu u shpreh nënkryetarit i PD-së, Edi Paloka, gjatë takimit me senatorët amerikanë Roy Blunt, John Cornyn, Tom Cotton dhe Thom Tillis, që po zhvillojnë një vizitë në Shqipëri.
Sipas nënkryetarit demokrat, zgjedhjet treguan më së miri se fenomeni i shitblerjes së votës është tashmë masiv, se paratë e krimit e të drogës blejnë pushtetin, e ai mbahet duke lejuar krimin dhe drogën.
“Ky nuk është më një shqetësim kombëtar, por po cënon sigurinë e rajonit ashtu siç dhe theksoi dhe prokurori italian Roberti pak ditë më parë”, theksoi Paloka.
Përmes një njoftimi, zbardhi detaje nga takimi, ku Paloka në emër të PD-së, “konfirmoi mirënjohen maksimale të popullit Shqiptar dhe në veçanti të opozitës për mbështetjen që Shtetet e Bashkuara i kanë dhënë demokracisë në vend”.
“Kjo vizitë është dëshmia më e mirë e kësaj mbështetjeje dhe të interesit të Shteteve të Bashkuara ndaj krizës që po kalon vendi”, tha Paloka.
Nënkryetari Paloka i njohu senatorët me faktin sipas tij se prej katër vitesh Shqipëria është nën diktatin e një qeverisjeje të kapur nga interesa të ngushta kriminale, një qeveri e cila ka mbështetur dhe është implikuar drejtpërsëdrejti në kanabizimin e vendit.
“Raportet ndërkombëtare, si ai i Departamentit të Shtetit dhe të mediave kanë theksuar shqetësimet e opozitës. Krimi i organizuar dhe rritja e trafikimit të drogës është bërë nën bekimin politik. Qeveria ështe njësh me krimin e organizuar duke angazhuar me kohë të plotë dhjetëra individë me rekorde kriminale, përfshirë dhe kandidimin e tyre”, tha Paloka.
Në vijim, ai i rikonfimoi senatorëve amerikanë se “Partia Demokratike do të vazhdojë të luftojë për një Shqipëri demokratike e një qeverisje totalisht të shkëputur nga interesat kriminale e korruptive duke mbështetur integrimin europian ashtu si dhe forcimin e shtetit ligjor”.
Në këtë drejtim, shtoi Paloka, kontributi i SHBA do të ngelet jetik duke dalë gjithmonë në krah të vlerave euro-atlantike të vërteta. /tesheshi.com/
