Edhe pse është shfaqur kritik permanent i Bashës, Astrit Patozi, i mbetur tashmë pa asnjë post prej tij por thjesht deputet, me qëndrimet që ka mbatjur ndaj protestës dhe nga sheshi i protestës, ka qenë pro aksionit më të ri politik të forcës ku ai militon. Patozi tha se nuk ka asnjë rrugë tjetër veç kësaj të rrugës, për të pamundësuar grabitjen e zgjedhjeve nga Rama.
“Në rast se qeveria do të rezistojë, edhe protesta do të jetë e gjatë. Uroj që qeveria të jetë e arsyeshme, dhe të pranojë një kërkesë legjitime, jo vetëm nga PD, por nga të gjithë qytetarët. Kjo është kauza e gjithë shqiptarëve, jo vetëm e PD. Ne kërkojmë zgjedhje të lira e të ndershme, asgjë më shumë se kaq. Ne kemi një qeveri tmerrësisht të dobët, që rri në këmbë vetëm me numra. Kemi një qeveri të rrënuar. Ndaj ne kemi shpresë sot se protesta do të kthejë shpresë te shqiptarët. Ne sot kërkojmë parandalimin e vrasjes së zgjedhjeve. Është e sigurt se zgjedhjet do të vidhen nëse ne nuk e ndalojmë qeverinë në përpjekjen e saj diabolike për të dëmtuar procesin. Çdo protestë është simbolike. Cilido qoftë numri i protestuesve, rëndësia qëndron te simboli. Qytetarët në këtë protestë kërkojnë zgjedhje të lira e ndershme”, tha Patozi.
Megjithatë ish-kreu i grupit parlamentar të PD-së dhë njëherësh ish-nënkryetar i kësaj partie, ka thënë se nuk kërkohet pushtet në tavolinë, siç po aludohet se fshihet pas kësaj strategjie të opozitës me dalje në rrugë për të protestuar.
Patozi mbrojti gjithashtu idenë se protesta e kësaj të shtune të opozitës, ishte më madhështorja ndonjëherë, si për nga shpirti e si për nga pjesëmarrja.
Komentet e Patozit u bënë gjatë një prononcimi në News 24. /tesheshi.com/
