Pas pranimit të Kosovës në UEFA, vendimi i liberalizimit të vizave i ka tmerruar krerët e Beogradit.
Serbët po shohin komplote ngado, dhe mediat e Beogradit sot janë të mbushura me tituj të tillë, “Kosova po njihet”, “Kroacia po bllokon hyrjen e Serbisë në Bashkimin Europian”, “Po rrethohemi nga fqinjët”, etj.
Siç bën të ditur agjencia e lajmeve Tanjug, ministri i Punës dhe i Çështjeve Sociale të Serbisë, Aleksandër Vulin, deklaroi se Beogradi do t’i kërkojë Këshillit të Sigurimit të OKB-së që të shprehet nëse është më e vlefshme rezoluta 1224, apo ajo është thjesht një “copë letre”.
I mbërthyer edhe ai nga atmosfera e shikimit të komploteve gjithandej, Vulin ka përsëritur se “po bëhen disa precedentë kundër nesh”.
Komentatorë të shumtë në kryeqytetin serb theksojnë se pasojat e hyrjes së Kosovës në UEFA do të jenë të paparashikueshme, dhe pritet që të ndodhin edhe raste të tjera.
“Shteti i Serbisë do të vazhdojë të luftojë, dhe ne nuk do të qëndrojmë ulur. Do të shkojmë në Gjykatën e Lozanës dhe kudo ku mund të luftojmë dhe të mbrojmë ligjin ndërkombëtar. Këshilli i Sigurisë duhet të bëjë një deklaratë me shkrim dhe të sqarojë nëse ekziston ende rezoluta 1224. Nëse ajo nuk ekziston, atëherë dikush duhet të na e thotë,” ka theksuar Vulin dukshëm i nervozuar.
I ngacmuar me përshkrimin se Serbia humbi në futboll, por fitoi në spektakël, siç është Eurosongu, ku është ndaluar flamuri i Kosovës, ai është përgjigjur: “Ne duhet të mbrojmë ligjin ndërkombëtar.”
“Kur mbrohet ligji ndërkombëtar, atëherë është i mbrojtur kushdo, por nëse ai shkelet, do të krijohen precedentë dhe ato nuk do të ndalen më,” ka deklaruar i pezmatuar ministri serb i Punës dhe Çështjeve Sociale.
Tabloidi nacionalist Kurir ka publikuar një foto të madhe të pasaportës së Kosovës, e shkruan: “BE-ja hap dritën jeshile për këtë dokument, kosovarët trajtohen si qytetarë të një shteti tjetër.” Një tjetër media, si Informer, thekson se, “Legjitimohet separatizmi!” /tesheshi.com/
