Pas SHBA, shprehen 28 vendet anëtare të BE-së: Reforma në drejtësi të miratohet nga deputetët

Pas Shteteve të Bashkuara të Amerikës, edhe Bashkimi Europian ka shpërndarë të njëjtën deklaratë ku i kërkon qeverisë që ta dërgojë draftin e reformës për drejtësi në Kuvend dhe i bën thirrje deputetëve që në mënyrë individuale të miratojnë reformën. Ndërkohëduhet ditur se  ambasada e BE-së nuk flet në emër të vetëm Komisionit Europian por të të gjithë shteteve anëtare të BE-së.

Deklarata e plotë

“Delegacioni i Bashkimit Evropian dhe Ambasadat e Shteteve Anëtare të BE-së në Tiranë shprehin keqardhjen që udhëheqësit politikë në Shqipëri nuk mundën të arrinin të hënën një marrëveshje për reformën në drejtësi.

Ne e mbështesim fort vazhdimin e procesit demokratik për të siguruar miratimin e propozimit aktual legjislativ, i cili përputhet plotësisht me standardet evropiane dhe angazhimet e Shqipërisë ndaj BE-së.

Të gjithë anëtarët e Kuvendit mbajnë përgjegjësi të veçantë para shumicës dërrmuese të qytetarëve shqiptarë që kërkojnë një gjyqësor të pavarur, profesional, të paanshëm dhe efektiv.

Ne e nxisim Shqipërinë të ndërmarrë hapat e nevojshme për miratimin e paketës ligjore për reformën në drejtësi”.

/tesheshi.com/