Pak ditë pas njohjes së Kosovës shtet nga Singapori, mund të vijnë edhe përfitimet e para nga ky vend. Ato janë kryesisht në fushën e ekonomisë dhe zhvillimit, një fakt që bëhet i ditur nga ministria e Punëve të Jashtme.
“Njohja e Republikës së Kosovës nga Singapori tashmë ka dhënë rezultatin e parë. Tani, Republika e Kosovës nga fuqia ekonomike zhvillimore e Singaporit do të fillojë të përfitojë menjëherë në shumë fusha, sidomos nga Programi i Bashkëpunimit i Singaporit (SCP)”, thuhet në njoftim.
Ky program sipas MPJ-së, është themeluar në vitin 1992 për të shërbyer si platformë primare, përmes të cilit Singapori ofron asistencë teknike për vendet e tjera. Singapori do të ndajë përvojën dhe ekspertizën e tij, në mënyrë të veçantë, në zhvillimin e burimeve njerëzore dhe zhvillimin ekonomik me Kosovën, duke ofruar specializime për nëpunësit publikë të Kosovës.
Ky program pritet të zbatohet në fillim të janarit të ardhshëm, pas dakordësimit mes ministrit të Punëve të Jashtme, Enver Hoxhaj dhe homologut të tij nga Singapori, Vivian Balakrishnan. Parashikohet që Kosova çdo vit të dërgojë nëpunësit civilë të saj për të marrë njohuri nga përvoja e Singaporit në zhvillimin ekonomik. Specializimet ofrohen në një gamë të fushave të tilla si, qeverisja publike dhe administrata, tregtia dhe zhvillimi ekonomik, mjedisi dhe planifikimit urban, aviacioni civil, transporti publik, arsimi, shëndetësia, si dhe teknologjia e informacionit dhe e komunikimit (TIK)./tesheshi.com/
