Pas një jave, skuadrat e shpëtimit e kishin humbur shpresën për të gjetur të gjallë Yamato Tanooka, fëmijën 7-vjeçar, i cili u zhduk gjatë një shëtitje në malet e ishullit Hokkiado. Mirëpo, ai është gjetur mëngjesin e të e kësaj të premteje në një hambar të përdorur nga ushtria japoneze. Tanooka ishte në gjendje jo të mirë shëndetësore, i lodhur e u dërgua me urgjencë në spital, por fatmirësisht gjendja e tij nuk është në rrezik për jetën.
Aventura e të voglit nisi të shtunën e shkuar, kur prindërit dhanë alarmin duke thënë se fëmija kishte humbur ndërsa luante mes pemëve në pyll. Pak orë më vonë prindërit pranuan se e kishin zbritur nga makina në shenjë ndëshkimi, duke qenë se 7-vjeçari ishte sjellë keq, duke gjuajtur drejt turistëve të tjerë me gurë.
“E lamë vetëm për pak minuta dhe pasi bëmë rreth 500 metra rrugë u kthyem pas por ai nuk ishte më”, – rrëfyen prindërit. Në këtë zonë malore ka edhe arinj, ndaj policia dhe forcat e shpëtimit i druheshin faktit se fëmija mund të ishte vrarë prej kafshëve. Në kërkim morën pjesë 200 ushtarë dhe agjentë të policisë, të cilët, nga fundi e humbën shpresën për ta gjetur të gjallë.
Yamato Tanooka arriti të ngjitej i vetëm në lartësinë 1000 metra të malit dhe të strehohej në një hambar, rreth 4 kilometra nga vendi ku u braktis. Sot në mëngjes ai arriti të gjendej nga policët. “Ishte aty, i veshur me një bluzë të zezë dhe pantallona blu e me këpucët e kuqe. Ishte vetëm dhe kur e gjetëm arriti të na thoshte emrin e tij. Më tha se ishte i uritur ndaj i dhashë ushqimin tim. Hëngri pak bukë, oriz dhe piu ujë”, – rrëfen ushtari që e gjeti.
Prindërit kërkuan falje që krijuan një situatë të tillë dhe mbajtën në ankth gjithë Japoninë, por tani mund të denoncohen për neglizhencë dhe braktisje të fëmijës. /tesheshi.com/
