Zvicra po përgatitet për referendumin për propozimin e projekt-ligjit për futjen të ardhurave bazë për të gjithë qytetarët, për të cilin disa aktivistë po thonë se do të flakë varfërinë dhe do të heqë varësinë nga ndihmat sociale.
Iniciuesit e kësaj iniciative, kanë propozuar që çdo person i rritur të fitojë nga 2.500 CHF në muaj, ndërsa fëmijët deri në moshën 18-vjeçare të marrin nga 625 CHF (CHF – Franga zvicerane).
Votuesit do të përcaktohen në lidhje me implementimin e këtij propozimi në referendumin që pritet të mbahet me 5 qershor. Gabriel Barta, i cili është anëtar i iniciativës për futjen e të ardhurave themelore ka thënë për mediat lokale që mund të kalojnë edhe dhjetë vite derisa ky propozim të kalojë në debat, të bëhen kalkulimet financiare dhe të fillojë zbatimi.
Siç thotë ai, me këtë ligj njerëzit nuk do të kenë nevojë të dëshmojnë se janë pa të ardhura bazë, për të përfituar ndihmë financiare.
“Këtyre njerëzve nuk u është garantuar një jetë e dinjitetshme siç është përcaktuar në Kushtetutë”, – ka thënë Barta.
“Na nevojiten të ardhura bazë në mënyrë që secili person, të zgjedhë se çfarë dëshiron të bëjë”, ka shtuar ai.
Kundërshtarët e kësaj fushate thonë se futja e masave të tilla do të kthente modelin e vjetër të familjeve, kur gratë kanë qëndruar në shtëpi dhe janë kujdesur për familje.
“Për ata njerëz të cilët nuk fitojnë 2.500 franga në muaj apo ndoshta nuk dëshirojnë të punojnë, për shkak se janë nëna dhe punojnë gjysmë orari, kjo është një nxitje për të qëndruar në shtëpi”, thotë Michael Gerfin, ekonomist në Univerzitetin në Bern. “Pyetja është, nëse shoqëria moderne dëshiron diçka të tillë apo jo”, shton ai.
Edhe qeveria finlandeze është duke shqyrtuar një pilot program dyvjeçar, i cili pritet të fillojë në vitin 2017, ku 10.000 njerëz do të marrin nga 550 euro çdo muaj. /tesheshi.com/
