Jo vetëm Edi Rama, por edhe shkrimtari i madh, Ismail Kadare, për deputeten socialiste, Elisa Spiropali është si Skënderbeu.
Deputetja ka publikuar një foto në rrjetet sociale në krah të Ismail Kadaresë, ndërsa e shoqëron me dxhiturën “Skënderbeu i letërsisë”.
Gjatë fushatën elektorale për zgjedhjet e 25 qershorit, më konkretisht në mitingun e mbajtur në Tiranë, Spiropali bëri një vlerësim të tillë për kryeministrin Edi Rama, që shkaktoi jo pak batuta në rrjete.
Në atë kohë Spiropali tha se ne duam Shqipërinë që ëndërron ky burri këtu, duke treguar me gisht nga busti i heroit kombëtar Gjergj Kastrioti Skënderbeu, që ndodhet në sheshin me të njëjtin emër. Në vijim deputetja e PS tha se një gjë të tillë mund ta realizojë vetëm Edi Rama.
Ndërkohë, ky i fundit ka deklaruar se ky do të jetë viti i Skënderbeut, ndërsa ka kërkuar ndihmën e qytetarëve për të dhënë mendimet e tyre për aktivitetet që do të organizohen.
Duket se deputetja socialiste pavarësisht humorit që shkaktoi me deklaratën e saj, ose ka ditur diçka më shumë mbi vendimin e pritshëm të qeverisë “Rama2”, ose është e apasionuar për të shkruar rreth figurës së Skënderbeut. /gj.k/ /tesheshi/
