Ende nuk ka deklarim zyrtar të Vetëvendosjes, pas akuzave të PDK-së se militantë të kësaj partie kanë rrahur gruan e Blerand Stavilecit.
Megjithatë, disa deputetë të VV-së kanë reaguar ndaj këtij sulmi, duke e cilësuar si një akt të papranueshëm.
Dardan Sejdiu, që është edhe nënkryetar i partisë, sulmin e ka cilësuar akt qyqar dhe të papranueshëm. Në lidhje me akuzat e PDK-së, ai thotë se janë për keqardhje, dhe sipas tij deklaratat e tilla lënë hapësirë për dyshime rreth inskenimeve të mundshme.
“Janë për keqardhje deklaratat e zyrtarëve të lartë të PDK-së që pa asnjë fakt akuzojnë Vetëvendosjen në lidhje me këtë rast, duke ndërhyrë në punën e organeve kompetente, që do të duhej sa më parë ta zbardhnin këtë akt kriminal. Ngutja e PDK-së për të akuzuar aktivistët e VV-së nuk përbën vetëm papjekuri të skajshme politike, por edhe lë hapësirë për dyshime rreth inskenimeve të mundshme me qëllime të këqija, çka me siguri se nuk do të përbënte risi. Ne ftojmë policinë dhe Prokurorinë që sa më parë të gjejnë fajtorët dhe t’i vënë para përgjegjësisë, ndërsa ftojmë PDK-në që t’i japë fund akuzave të pabaza dhe tendenciozë që nxisin konflikt në shoqërinë tonë”, ka shkruar ai.
Ndërsa deputetja Shqipe Pantina e ka quajtur të turpshme rrahjen e një gruaje.
“Cilat do qofshin arsyet dhe motivet është e turpshme dhe e papranueshme të ngrihet dorë mbi një grua! Organet e rendit mjaft më me togefjalshin ‘hetimet vazhdojnë’”, ka shkruar Pantina në Facebook.
Me gjuhën të cilën e karakterizon, ka reaguar edhe deputeti Fisnik Ismaili.
“Duhesh me qenë idiot, zdral e zog i qyqes, që të sulmosh një grua. E kështu tinzarësh pak si shpesh kohëve të fundit po sulmojnë gra zyrtarësh, e po iu djegin makinat, dhe çuditërisht ende nuk është kapur asnjëri. Këta njerëz duhen çuar në burg, jo vetëm për veprën e poshtër të sulmit, por edhe për përpjekjen që çdo herë i jepet ngjyrim politik këtyre akteve të dhunshme. Këta zalloga s’janë burra, s’janë trima. Janë krijesa të poshtra, me qëllime të poshtra. Do iu vijë dita edhe këtyre dhe çdo e vërtetë do të zbardhet”, ka shkruar Ismaili në Facebook.
Deputeti Ismaili ka mohuar akuzuat e PDK-së duke thënë se VV nuk bën gjeste tinzare.
“Në asnjë rast nuk ka ndodhur që dikush i Lëvizjes Vetëvendosje të bëjë gjeste tinzare, sepse ne s’kemi pse të fshehim asgjë. Ne nuk rrahim gra, por e promovojmë gruan në çdo moment në çdo aspekt. Ne nuk jemi farë e fëlliqur sikur ju, me sulmue pas shpine”, ka shkruar Ismaili. /tesheshi.com/
