Një ditë më parë, kryeministri Edi Rama foli me tone të ashpra ndaj inspektorëve të AKU-së, duke i cilësuar si bandë gjobëvënësish. Madje Rama kërkoi dorëheqjen e të gjithë atyre që ishin emëruar në detyrë jashtë kritereve thjesht për të marrë një rrogë.
Ndërkohë po dje, dy inspektorë të AKU-së u arrestua nga policia për shpërdorim detyre. Policia e Pogradecit bëri të ditur arrestimin e shtetasve Vangjel Teodor, 62 vjeç, Feridon Ibi, 55 vjeç, dhe Dashamir Çaushi, 63 vjeç.
Policia bëri të ditur se shtetasi Vangjel Teodor, u kap në flagrancë nga shërbimet e Policisë në aksin rrugor Qafë Thanë-Pogradec, duke transportuar me mjetin e tij tip furgon me targa PG 4046 B, një sasi prej 4600 kg rrush, të vendosur në 230 arka. Nga verifikimet e kryera dyshohet se shtetasi i mësipërm, ka falsifikuar deklaratat e origjinës së mallit pasi ka bërë shmangien e një sasie prej 2300 kg të kësaj sasie, si edhe ka ndryshuar varietetin e këtij produkti në praktikën doganore, duke mos e deklaruar se shërbente për prodhim industrial.
Në vijim të këtij rasti, dy inspektorët e AKU-së, shtetasit Feridon Ibi dhe Dashamir Çaushi, duke qenë të planizuar me shërbim pranë degës doganore Qafë-Thanë, dyshohet të kenë shpërdoruar detyrën, pasi kanë përpiluar një raport fito-sanitar duke tjetërsuar cilësinë e këtij produkti (ku sasia më e madhe e tij shërbente për prodhim industrial).
Në cilësinë e provës materiale u sekuestruan mjeti tip furgon dhe sasia e produktit. Materialet në ngarkim të tyre i kaluan Prokurorisë të Rrethit Gjyqësor Pogradec për veprat penale : “kontrabanda me mallra për të cilat paguhet akcizë”, “falsifikimi i dokumenteve”, “shpërdorimi i detyrës, kryer në bashkëpunim”, parashikuar nga nenet 172, 186, 248 e 25 të Kodit Penal. /tesheshi.com/
