Pas pesë orë diskutimesh me të rinjtë e FRPD-së, Lulzim Basha i ka kërkuar ndjesë drejtuesve të forumit për mospërfaqësimin në listat e zgjedhësve. Burimet nga PD bëjnë të ditur se takimi është kërkuar nga FRPD, që ka kërkuar garanci nga kreu demokrat për respektimin e kuotave të përfaqësimit në listat e kandidatëve, qofshin këto për zgjedhjet vendore apo parlamentare.
Në këtë kuadër, duket se FRPD ka marrë garancitë nga Basha që në ndryshimet statutore do të sanksionohen kuotat e përfaqësimit. Burimet bëjnë të ditur se gjatë takimit, Belind Këlliçi, kryetar i FRPD-së, e ka cilësuar si thyerje besimi atë që ndodhi me listat e kandidatëve për deputet të 25 qershorit, kjo për faktin se Basha premtoi publikisht kuotën prej 35 %.
Gjithsesi ky takim nuk ka mundur të që thyejë ngërçin e krijuar, por është cilësuar si hapi i parë për vendosjen e një besimi të ri.
Mësohet se gjatë takimit është diskutuar mbi lëvizjen për ripërtëritjen e PD-së, e inicuar nga Astrit Patozi dhe shumë ish-drejtues të kësaj partie. Kjo lëvizje është mbështetur nga Sekretari i Përgjithshëm i FRPD-së, Grigels Muçollari, por duket se palët kanë rënë dakort që gjithçka të diskutohet brenda forumeve partiake.
“Pas një diskutimi të hapur e konstruktiv me Kryetarin e Partise Demokratike, Lulzim Basha mbi atë se ku u gabua për zgjedhjet e 25 qershorit, çfarë nuk duhet të ishte bërë dhe çfarë mund të bëhej më mirë, ne nisim të vendosur dhe të bashkuar rrugëtimin jo të lehtë për kthimin e shpresës dhe besimit.
Qëllimi ynë kryesor dhe i përbashkët është që ti shkurtojme sa më shumë ditët kësaj qeverie dhe këtij kryeministri të lidhur kokë e këmbë me krimin dhe trafikun e drogës.
Rinia shqiptare nuk e meriton Edi Ramën në krye!”, shkruan Belind Këlliçi në një koment në rrjetet sociale, që më pas është shpërndarë edhe nga kreu demokrat Lulzim Basha. /tesheshi.com/
