Partia e Lirisë, kandidati i së cilës humbi me një diferencë jashtëzakonisht të vogël në raundin e dytë të zgjedhjeve presidenciale austriake, ka paraqitur në Gjykatën Kushtetuese të vendit një material prej 150 faqesh, që vë në pah parregullsitë e votimit.
Udhëheqësi i partisë, Heinz-Christian Strache, pohoi se kishin marrë informacione të ndryshme për parregullsi të mundshme në zgjedhjet e 22 majit.
“Nuk jemi humbës të pezmatuar,” deklaroi ai. “Kjo ka të bëjë me mbrojtjen e themeleve të demokracisë.”
Mënyra e trajtimit të votave postare, numërimi i votave të personave që nuk kanë marrë pjesë në votim, lejimi i të huajve dhe i personave nën 16 vjeç që të votojnë, janë mes parregullsive të paraqitura para gjykatës nga ekstremistët e djathtë austriakë.
Gjykata duhet të përgjigjet brenda katër javëve. E nëse e shfrytëzon të plotë këtë periudhë kohore, vendimi do të jepet vetëm dy ditë para se Alexander Van der Bellen të betohet si president i ri.
Van der Bellen, që kishte mbështetjen e të gjelbërve, u deklarua fitues me 50.3% të votave, kundrejt 49.7% të votave të Norbert Hofer-it, kandidatit të Partisë së Lirisë.
Edhe pse posti i presidentit është më së shumti ceremonial në Austri, fitorja e Norbert Hofer-it do ta kishte bërë atë të parin kryetar shteti të ekstremit të djathtë në Bashkimin Europian. /tesheshi.com/
