Me 61 vota pro, asnjë kundër dhe 11 abstenime, Kvendi i Kosovës miratoi rezolutën në mbështetje të vlerave të UÇK-së. Abstenimi erdhi vetëm nga Vetëvendosja. Rezoluta i dikton kuvendit që brenda gjashtë muajsh të nxjerrë Ligjin për vlerat e UÇK-së.
Ndërsa Vetëvendosje nga ana e saj ka propozuar një rezolutë tjetër, por që nuk është hedhur në votim nga kryetari Kadri Veseli me arsyetimin se ajo lloj rezolute kërkon ndryshimin e Kushtetutës.
“Lufta çlirimtare e Kosovës e udhëhequr nga Ushtria Çlirimtare e Kosovës me qëllim të çlirimit të Kosovës, sjelljes së lirisë dhe pavarësie për popullin e Kosovës me karakter mbrojtjen dhe çlirimtare, duke e respektuar, të drejtën dhe standardet më të larta të luftës, e drejtuar ekskluzivisht kundër forcave ushtarake policore dhe administratës okupuese të Serbisë në Kosovës, është lufta e armatosur e popullit të Kosovës e cila mbrohet dhe çmohet nga çdo qytetarë dhe institucion i Republikës së Kosovës. Pjesëtarët e UÇK-së, me sakrificën dhe angazhimin dhe kontributin e tyre të çmuar në luftën e çlirimtare të Kosovës ishin faktor vendimtar për sjelljen lirisë, e pavarësisë për popullin e Kosovës dhe në këtë drejtim gëzojnë dhe duhet të gëzojnë mbështetjen dhe vlerësimin e tyre të merituar institucional në pajtim me Kushtetutën dhe legjislacionin në fuqi”, thuhet në rezolutë, ndërsa në rastin e “Drenicës”, veçohet se: “Edhe në rastin e dënimit të grupit Drenica i bëjmë thirrje të gjitha institucioneve e pushtetit publik dhe sidomos gjykatat që t’i kushtojnë kujdes esencës së të drejtës që kufizohet, rëndësisë së qëllimit të kufizimit, natyrës dhe vëllimit të kufizimit, raportit midis kufizimit dhe qëllimit që synohet të arrihet, si dhe ta shqyrtojë mundësin e arritjes së atij qëllimi me kufizim më të vogël”, thuhet në rezolutë.
Rezuluta konsiderohet dhe si një sfidim i Gjykatës Speciale, e cila pikërisht pritet të çmitizojë me akuza luftën e UÇK-së. Tashmë priten vetëm reagimet e ndërkombëtarëve për këtë rezolutë. /teshesh.com/
