Greqia do t’i bashkohet një numri vendesh të tjera që e kanë njohur shtetin e Palestinës. Ditën e nesërme do të ketë një votim parlamentar, që do të pasohet nga një ceremoni.
I pranishëm do të jetë dhe presidenti i Palestinës, Mahmud Abbas, i cili gjendet prej sot në vendin helen për një vizitë dyditore, dhe ka në axhendë takime me presidentin dhe kryeministrin e Greqisë.
Votimi i nesërm është paraprirë nga një mocion për njohjen e Palestinës, i aprovuar njëzëri javën e shkuar në Komisionin e Punëve të Jashtme të parlamentit grek.
Njohja e shtetit të Palestinës është, sipas autoriteteve, pjesë e politikës së jashtme shumëdimensionale që ka vendosur të ndjekë qeveria greke.
Siç njoftonte ditë më herët shtypi grek, njohja e Palestinës do të bëhet në parlament, ndërsa qeveria nuk do të mbajë një qëndrim tani për tani, duke kërkuar të shmangë dëmtimin e marrëdhënieve të mira me Izraelin. /tesheshi.com/
