Kanali televiziv egjiptian Almasry Alyoum zhvilloi një intervistë të veçantë dypjesëshe me veteranin politik Amr Moussa, ish-Sekretar i Përgjithshëm i Ligës Arabe dhe ish-Ministër i Jashtëm i Egjiptit, në episodin e parë të një serie dialogu të titulluar “E ardhmja e Lindjes së Mesme”, e cila do të transmetohet çdo të enjte.
Në këtë intervistë, Amr Moussa paralajmëroi ndër të tjera se “ekspansioni izraelit do të arrijë në Arabinë Saudite, se nuk do të ndalet në kufijtë e shtetit palestinez dhe se nuk do të bëjë hije vetëm mbi Egjiptin dhe Jordaninë”.
Ai më pas shtoi: “Nuk ka zgjidhje për këtë çështje nëse arabët nuk kanë një vullnet serioz për të lidhur normalizimin dhe çdo hap drejt paqes me një zgjidhje gjithëpërfshirëse dhe të drejtë të çështjes palestineze. Pse ne arabët duhet të pranojmë politikat ekspansioniste të Izraelit?”
Izraeli aneksoi Lartësitë Golan dhe dëshiron të ndërtojë vendbanime në Libanin jugor dhe më pas të kthehet për të ndërtuar vendbanime në Gaza. Ka fuqi dhe figura të mëdha ndërkombëtare që kanë thënë se toka në të cilën shtrihet aktualisht entiteti sionist është “shumë e vogël për Izraelin” dhe se ne duhet ta lejojmë atë të zgjerohet. “Imagjinoni, a mund të lejohet që Izraeli (ky vend ‘i varfër’ dhe ‘i ngushtë’ të zgjerohet? Është padyshim një ekspansion kolonial.”
Ish-Sekretari i Përgjithshëm i Ligës Arabe tha më pas: “Kur bëhet fjalë për Bregun Perëndimor, Gazën, Jerusalemin Lindor dhe rrethinat e tij, Izraeli ka filluar të zgjerohet në kurriz të të gjithë fqinjëve të tij dhe planifikon të pretendojë toka të tjera, duke përfshirë tokat saudite, siç do të shohim, dhe jo vetëm Egjiptin dhe Jordaninë, dhe kjo do të çojë në kaos të madh në të gjithë rajonin”.
Amr Moussa paralajmëroi gjithashtu për pasojat e tmerrshme të heshtjes së vendeve arabe dhe dështimin e tyre për të marrë një pozicion të unifikuar përballë “sfidave serioze ekzistenciale”.
Ai shprehu shqetësimin për të ardhmen e rajonit, duke vënë në dukje se “zemërimi i ndrydhur arab do të shpërthejë në mënyrë të pashmangshme përballë planeve izraelite. Sepse nuk është normale që një qytetar arab të shikojë se çfarë po ndodh në Gaza dhe Liban, apo më gjerë, dhe pastaj të heshtë, dhe qarqet sioniste ta interpretojnë atë heshtje si një shenjë të pranimit të situatës, ‘me forcë’ apo ‘me hir’, nuk ka rëndësi”, shtoi Amr Moussa. /tesheshi.com/
