Vuan fort përfaqësuesja argjentinase pa Lionel Messi-n. Edhe një herë tjetër ajo nuk mundet të fitojë pa të. Por nëse pesë ditë më parë barazoi ndaj Perusë, në të nisur të ditës së sotme ka humbur ndaj Paraguajit, e për më tepër në fushën e vet.
Në ndeshjet e dhjeta të kualifikueseve të Botërorit për Amerikën e Jugut, Argjentina ka humbur 0-1 ndaj Paraguajit. Rezultati është vendosur nga goli i Gonzalez-it në minutën e 18-të. Edhe pse në fushë kanë qenë dy prej sulmuesve më të mirë në botë, Higuain e Aguero, nuk ka qenë e mundur të shmanget humbja. Madje Aguero ka çuar dëm dhe një 11-metërsh në fillim të pjesës së dytë.
Ndërsa Argjentina ka rrëshqitur në vendin e pestë në klasifikimin e dhjetë ekipeve kombëtare, Brazili ka marrë kryesimin me fitoren 0-2 ndaj Venezuelës. Gabriel Jesus e Willian kanë qenë shënuesit për Brazilin.
Uruguaji, deri më tani kryesuesi i grupit amerikanolatin, ka barazuar 2-2 me Kolumbinë në transfertë. Fillimisht do të shënonte Aguilar për vendasit, ndërkohë që uruguajanët do të barazonin e do të kalonin në epërsi me golat e Rodriguez-it dhe Suarez-it. Gjashtë minuta para përfundimit të ndeshjes, Mina vendosi barazpeshën, që nuk do të ndryshonte më. Uruguaji ndjek Brazilin në klasifikim, me një pikë më pak.
Kili u është kthyer fitoreve, duke mundur 2-1 Perunë. Arturo Vidal ishte heroi i ndeshjes me dy golat e tij.
Një tjetër barazim 2-2 do të regjistrohej në takimin Bolivi – Ekuador.
Në grupin amerikanolatin rinisin po ashtu në nëntor kualifikueset e Botërorit, e për më tepër me më të madhen përballje: Brazil – Argjentinë! /tesheshi.com/
